بيزنەسكە زاڭسىز ارالاسۋ: 6 لاۋازىمدى تۇلعاعا قاتىستى تەرگەۋ باستالدى

استانا. KAZINFORM - جىل باسىنان بەرى كاسىپكەرلىك سۋبەكتىلەرىنىڭ قىزمەتىنە زاڭسىز ارالاسۋ فاكتىلەرى بويىنشا 6 لاۋازىمدى تۇلعاعا قاتىستى 8 سوتقا دەيىنگى تەرگەپ-تەكسەرۋ ءىسىن باستادى، ونىڭ ىشىندە 5 ءىس سوتقا جولداندى، دەپ حابارلايدى ق ر سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى.

ەستەرىڭىزگە سالا كەتەيىك، 2022-جىلى مەملەكەت باسشىسى وتاندىق بيزنەستىڭ قاتىسۋىمەن وتكەن كەزەكتى كەڭەستە قۇقىق قورعاۋ ورگاندارىنا بيزنەستى قورعاۋ سالاسىندا ءبىرقاتار ناقتى تاپسىرمالار بەرگەن بولاتىن.

اگەنتتىك بۇل تاپسىرمانى 3 نەگىزگى باعىت بويىنشا ىسكە اسىرادى:

1. «بيزنەسكە جول» جوباسى شەڭبەرىندە بيزنەس سۋبەكتىلەرىنە قۇقىقتىق كومەك كورسەتۋ؛

2. كاسىپكەرلەردىڭ وتىنىشتەرىن ساپالى جانە ۋاقتىلى قاراۋ؛

3. ادال كاسىپكەرلەردى قىلمىستىق قۋدالاۋعا نەگىزسىز تارتۋدان قورعاۋ. ول ءۇشىن اگەنتتىك ىشىندە سوتقا دەيىنگى تەرگەپ- تەكسەرۋلەردى تىركەۋدىڭ اۋماقتىق دەپارتامەنتتەرىنىڭ كەلىسۋىن جانە بيزنەسكە قاتىستى جەكەلەگەن تەرگەۋ ارەكەتتەرىن جۇرگىزۋدى كوزدەيتىن الگوريتم ازىرلەنىپ، قولدانىلۋدا (جەتكىزۋدى، ۇستاۋدى؛ كۇدىكتى رەتىندە تانۋدى؛ قورعاۋعا قۇقىعى بار كۋا، كۋا رەتىندە جاۋاپ الۋدى؛ ءتىنتۋ، الۋ، تەكسەرۋ، قۇجاتتامانى الۋ، جوسپاردان تىس تاعايىنداۋدى كەلىسۋ كوزدەلگەن تەكسەرۋلەر؛ تىيىم سالۋ، مۇلىككە ۋاقىتشا شەكتەۋلەر بەلگىلەۋ).

بۇل الگوريتمدى قولدانۋ كاسىپكەرلەردى 900 دەن استام تەرگەۋ ارەكەتىنەن قورعادى. بۇل كاسىپكەرلەردىڭ 9 ايدان استام جۇمىس ۋاقىتىن ۇنەمدەۋگە مۇمكىندىك بەردى.