بيزنەسكە بەرىلەتىن نەسيەلەردىڭ پايىزدىق مولشەرلەمەسى تومەندەتىلدى

   شاعىن جانە ورتا بيزنەسكە بەرىلەتىن نەسيەلەردىڭ پايىزدىق مولشەرلەمەسى تومەندەتىلىپ، قارىزدى قايتارۋ مەرزىمى ۇزاردى.

مۇنداي جەڭىلدىك كاسىپكەرلىكتى قولداۋ مەن دامىتۋعا ارنالعان كەشەندى باعدارلاما اياسىندا وندىرىستە كۇردەلى تەحنولوگيالاردى قولداناتىن كاسىپورىندارعا بەرىلەدى. ول «بيزنەستىڭ جول كارتاسى» جانە «قاراپايىم زاتتار ەكونوميكاسى» باعدارلامالارىنىڭ بىرىگۋىنەن پايدا بولدى. ۇكىمەتتىڭ باسپا ءسوز قىزمەتى بۇل تەتىكتەر جاقىن ارادا ەنگىزىلەتىنىن مالىمدەدى. ازىرگە قولدانىستاعى مەحانيزمدەردىڭ ناتيجەسىن سارالاپ جاتىر. قازىر سۋبسيديانىڭ تەڭ جارتىسى وڭدەۋ ونەركاسىبى سالاسىنداعى كاسىپورىندارعا بەرىلەدى. نەسيەلەرگە بەرىلەتىن كەپىلدىك سوماسى ۇلعايتىلدى. بۇعان قوسا مەملەكەتتىك قولداۋدىڭ بالامالى قۇرالى رەتىندە سينديكاتتالعان نەسيەلەۋ قاراستىرىلعان. ياعني، ءىرى جوبالاردى ءبىر مەزگىلدە بىرنەشە بانك ارقىلى 15 ميلليارد تەڭگەگە دەيىن قارجىلاندىرۋ مۇمكىندىگى بار. جارتى جىل ىشىندە كەشەندى باعدارلاما اياسىندا 8 مىڭنان استام جوباعا سۋبسيديا بەرىلىپ، 5 مىڭنان اسا كاسىپكەر كەپىلدىك الدى.

 24.kz