بيزنەسكە 12,6 پايىزبەن 8 تريلليون تەڭگە نەسيە بەرۋ ينفلياتسيانى ورشىتپەي مە - ۇلتتىق بانك جاۋابى

فوتو: Фото: Виктор Федюнин/Kazinform

استانا. KAZINFORM - ۇلتتىق بانك ءتوراعاسى تيمۋر سۇلەيمەنوۆ ۇكىمەتتىڭ «بايتەرەك» ۇلتتىق باسقارۋ حولدينگى ارقىلى بيزنەسكە 12,6 پايىزبەن 8 تريلليون تەڭگە نەسيە بەرۋ تۋرالى شەشىمى ينفلياتسياعا قالاي اسەر ەتەتىنىن ايتتى.

- بازالىق مولشەرلەمەدەن 4 پايىز ارزان نەسيەنى 8 تريلليون تەڭگە كولەمىندە ءبولۋ ۇلتتىق بانكتى بازالىق مولشەرلەمەنى كوتەرۋگە ماجبۇرلەمەي مە؟ بيزنەسكە بازالىق مولشەرلەمەنى اينالىپ وتەتىن قولداۋ كورسەتۋ ەكونوميكانىڭ باسقا سالالارىنا قاتىستى ادىلەتسىز شەشىم دەپ ويلامايسىز با، - دەپ سۇرادى جۋرناليست.

ۇلتتىق بانك ءتوراعاسى بازالىق مولشەرلەمە تۋرالى بۇگىنگى شەشىم «بايتەرەكتىڭ» 12,6 پايىزدىق نەسيەسىن ەسكەرە وتىرىپ قابىلدانعانىنا سەندىردى.

- ارينە، ءبىز پرەمەر-مينيستر ايتقان ۇسىنىستى بىلەمىز. ءبىزدىڭ بۇگىنگى شەشىمىمىز ۇكىمەتتىڭ ول باستاماسىن ەسەپكە الا وتىرىپ قابىلداندى. ينفلياتسيا تاۋەكەلدەرىن باعالاعان 12,6 پايىزبەن بيزنەسكە بەرىلەتىن 8 تريلليون تەڭگەنىڭ ىقپالىن دا ەسەپتەدىك.

تۇتاس ەكونوميكادان بيزنەستى ءبولىپ الىپ، بازالىق مولشەرلەمەدەن تومەن مولشەرلەمەمەن نەسيە بەرۋ قانشالىقتى ءادىل دەگەنگە كەلسەك، بۇل وتە سەزىمتال ءارى كۇردەلى ماسەلە. بۇل 8 تريلليون تەڭگە «بايتەرەك» ۇلتتىق باسقارۋ حولدينگى ارقىلى بەرىلەدى. ولار نەسيەنى باعىتتايتىن جوبانى ىرىكتەپ الادى. دەمەك ونى تاڭداۋدىڭ ناقتى ەرەجەسى بار. سوندىقتان ادىلەتتىلىك تۋرالى سۇراقتى حولدينگ وكىلدەرىنە قويعان ءجون، - دەدى تيمۋر سۇلەيمەنوۆ.

ەسكە سالايىق، بۇگىن ۇلتتىق بانك بازالىق مولشەرلەمەنى تاعى وزگەرىسسىز قالدىردى.