بىزدە تەحنولوگيالىق تاۋەلسىزدىك جوق - كۇنسۇلۋ زاكاريا
استانا. KAZINFORM - سەناتتا عىلىمي-تەحنيكالىق قىزمەتتى دامىتۋ ماسەلەسىنە ارنالعان كەزدەسۋ ءوتىپ جاتىر. جيىندا ءسوز العان ق ر پرەزيدەنتىنىڭ عىلىم جانە يننوۆاتسيالار ماسەلەلەرى جونىندەگى كەڭەسشىسى كۇنسۇلۋ زاكاريا قاتىسۋشىلاردى مەملەكەتتىك رامىزدەر كۇنىمەن قۇتتىقتاي كەلىپ، عىلىمنىڭ كەنجە قالىپ جاتقان سالالارىنا توقتالدى.
- مەملەكەتتىك رامىزدەر كۇنىن جىل سايىن اتاپ ءوتىپ جۇرگەنىمىز - تاۋەلسىزدىگىمىزدىڭ بەلگىسى. دەگەنمەن شەكارامىز بەن ءتىلىمىز، كونستيتۋتسيامىز بەن رامىزدەرىمىز بولعانىمەن، تەحنولوگيا جاعىنان بىزدە ءالى تاۋەلسىزدىك جوق. تەحنولوگيالاردى، كوپتەگەن ءونىمدى ءبىز سىرتتان اكەلەمىز. ول بارىڭىزگە ءمالىم. قازىرگى تاڭدا عىلىمدى دامىتۋ قازاقستان ءۇشىن باسىم باعىتتاردىڭ ءبىرى ەكەنىن بىلەسىزدەر. سەبەبى عىلىم - ەكونوميكانىڭ وسۋىنە ىقپال ەتەتىن، جاڭا جۇمىس ورىندارىن اشاتىن، ازاماتتاردىڭ ءومىر ساپاسىن جاقسارتاتىن تەحنولوگيالىق يننوۆاتسيالاردىڭ نەگىزى، - دەدى ول.
عالىم ەلىمىزدە عىلىم سوڭعى جىلدارى ايتارلىقتاي ىلگەرىلەگەنىن ايتادى.
- عىلىمي ۇيىمداردى جاڭعىرتۋ شارالارىنىڭ، شەتەلدە تاعىلىمدامادان وتۋشىلەردىڭ سانى بىرتە-بىرتە ارتىپ كەلەدى. بۇل عىلىمدى جاڭا ۇرپاق ءۇشىن تارتىمدى ەتىپ وتىر، - دەدى كۇنسۇلۋ زاكاريا.
ايتا كەتەيىك، بۇگىن گۇلزات كوبەنوۆا ق ر عىلىم جانە جوعارى ءبىلىم ۆيتسە-ءمينيسترى لاۋازىمىنا تاعايىندالدى.
اۆتور
ەسىمجان ناقتىباي