بيىلدان باستاپ ەلىمىزدە ۇلتتىق سپورت وليمپيادالىق سپورتپەن ءبىر دەڭگەيدە بولادى

استانا. KAZINFORM - ۇلتتىق سپورت تۇرلەرى - قازاقستاننىڭ مادەني كودىنىڭ ماڭىزدى بولىگى ءارى مەملەكەتتىك ساياساتتىڭ باسىم باعىتتارىنىڭ ءبىرى. بيىل ماۋسىم ايىندا كۇشىنە ەنگەن «دەنە شىنىقتىرۋ جانە سپورت تۋرالى» زاڭنىڭ جاڭا رەداكسياسىندا ۇلتتىق سپورت تۇرلەرى وليمپيادالىق جانە پاراليمپيادالىق سپورت تۇرلەرىمەن ءبىر دەڭگەيدە باسىم باعىتتار قاتارىنا ەنگىزىلدى.

بۇل تۋرالى تۋريزم جانە سپورت مينيسترلىگى مالىمدەدى.

بۇل ۇلتتىق سپورتتى ماقساتتى تۇردە قارجىلاندىرۋعا جانە ونى جوعارى جەتىستىكتەر سپورتى رەتىندە تانۋعا جول اشادى.

2025-جىلعى 14-ناۋرىزدا وتكەن ۇلتتىق قۇرىلتايدىڭ IV وتىرىسىندا مەملەكەت باسشىسى «ۇلتتىق سپورت - مادەني بىرەگەيلىگىمىزدىڭ اجىراماس بولىگى جانە ۇلت ساۋلىعىن تاربيەلەۋدەگى ماڭىزدى قۇرال»، - دەپ اتاپ وتكەن ەدى.

بۇگىندە ەلىمىزدە 11 ۇلتتىق سپورت ءتۇرى بەلسەندى دامىپ كەلەدى: اسىق اتۋ، اۋدارىسپاق، بايگە، ءداستۇرلى ساداق اتۋ، جامبى اتۋ، جەكپە-جەك، كوكپار، قازاق كۇرەسى، قۇسبەگىلىك، تەڭگە ءىلۋ جانە توعىزقۇمالاق. ونىڭ تورتەۋى يۋنەسكونىڭ ماتەريالدىق ەمەس مادەني مۇرالار تىزىمىنە ەنگەن (قۇسبەگىلىك، توعىزقۇمالاق، قازاق كۇرەسى جانە اسىق اتۋ).

2024-جىلدىڭ قىركۇيەك ايىندا استانادا V دۇنيەجۇزىلىك كوشپەندىلەر ويىنى ءوتتى. بۇل ءدۇبىرلى دوداعا 89 ەلدەن 2700 سپورتشى قاتىستى. وتانداستارىمىز 112 مەدال، ونىڭ ىشىندە 43 التىن مەدال جەڭىپ الىپ، جالپىكوماندالىق ەسەپتە ءبىرىنشى ورىن يەلەندى. سونداي-اق جىل سايىن ەلىمىزدە مىناداي سپورتتىق ءىس-شارالار وتكىزىلەدى:

«اق ءبيداي» - اۋىل سپورت ويىندارى

«قازاقستان بارىسى» - رەسپۋبليكالىق تۋرنير

«ۇلى دالا جورىعى» - مارافون-بايگە

ەل كولەمىندە ءتۇرلى ەتنوسپورت فەستيۆالدەرى مەن چەمپيوناتتار

ۇلتتىق سپورت - پاتريوتيزمنىڭ، ۇرپاق ساباقتاستىعىنىڭ جانە تۋعان جەرگە دەگەن سۇيىسپەنشىلىكتىڭ ايقىن كورىنىسى.

ايتا كەتەيىك، قازاقستاندا ۇلتتىق سپورت تۇرلەرىنەن كاسىبي باپكەرلەر دايىندالىپ جاتىر.

2024-جىلدىڭ قورىتىندىسى بويىنشا ۇلتتىق سپورت تۇرلەرىمەن تۇراقتى تۇردە اينالىساتىن قازاقستاندىقتاردىڭ سانى 660 مىڭنان استى.