بيىلعى كوكتەم مەن جازدا كۇن رايى قانداي بولادى - قازگيدرومەت بولجامى
استانا. KAZINFORM - «قازگيدرومەت» ر م ك- سى 2024 -جىلدىڭ كوكتەم جانە جاز ايلارىنداعى كۇن رايى بولجامىن جاريالادى.
ءساۋىر جانە مامىر ايلارىندا ەل اۋماعىنىڭ باسىم بولىگىندە اۋانىڭ ورتاشا تەمپەراتۋراسى ءبىر ايداعى نورمادان 1° جوعارى بولادى دەپ كۇتىلۋدە. جاۋىن-شاشىن مولشەرى ءساۋىر ايىندا رەسپۋبليكا اۋماعىنىڭ باسىم بولىگىندە نورمادان كوپ. ەلىمىزدىڭ سولتۇستىك-شىعىسىندا، ورتالىعىندا جانە وڭتۇستىك وبلىستارىنىڭ سولتۇستىگىندە - نورما شاماسىندا، مامىردا جاۋىن-شاشىن مولشەرى ەلدىڭ باسىم بولىگىندە كليماتتىق نورما شاماسىندا بولجانادى.
كوكتەمگى اۋا رايىندا توسىنسىيلار بولۋى مۇمكىن، ويتكەنى وتپەلى ماۋسىمدىقتا سينوپتيكالىق پروتسەستەر وتە قۇبىلمالى بولىپ تۇر. كاسپيدىڭ وڭتۇستىگىنەن جانە رەسەيدىڭ ەۋروپالىق اۋماعىنان كەلەتىن سيكلونداردىڭ اسەرىنەن جاۋىن-شاشىن بولادى: تۇندە جاڭبىر مەن قار جاۋىپ، كۇندىز جاڭبىر جاۋادى، ال وڭتۇستىك ايماقتاردا سۋىق اۋا ماسسالارىنىڭ ەنۋىنىڭ سالدارىنان ۇسىك بولۋى مۇمكىن.
ماۋسىم ايىندا اۋانىڭ ورتاشا ايلىق تەمپەراتۋراسى رەسپۋبليكانىڭ باسىم بولىگىندە نورمادان 1-2° جوعارى، ياعني ادەتتەگىدەن ىستىق، ەلدىڭ باتىس بولىگىندە نورما شاماسىندا بولادى دەپ بولجانادى.
شىلدە، تامىز ايلارىندا قازاقستاندا اۋانىڭ ورتاشا ايلىق تەمپەراتۋراسى نورما شاماسىندا، تەك تامىزدا ەلدىڭ وڭتۇستىگى مەن وڭتۇستىك- شىعىسىندا نورمادان 1°جوعارى بولادى.
ەگەر جازدىڭ باسىندا ماۋسىم ايىندا الدىن الا بولجام بويىنشا قازاقستاننىڭ باسىم بولىگىندە جاۋىن- شاشىن مولشەردەن از بولسا، شىلدە جانە تامىز ايلارىندا ق ر كوپتەگەن وبلىستارىندا جاۋىن - شاشىن مولشەرى نورما شاماسىندا جانە نورمادان كوپ، شىلدە ايىندا ەلدىڭ وڭتۇستىك-باتىسىندا جانە وڭتۇستىك جارتىسىندا، ال تامىزدا ەلدىڭ ورتالىعىندا، وڭتۇستىكتە جانە وڭتۇستىك- شىعىستا نورمادان از بولادى دەپ بولجانادى.
ماۋسىمدىق اۋا رايى بولجامى اۋا تەمپەراتۋراسى مەن جاۋىن-شاشىن بويىنشا ورتاشا الىنعان مەتەورولوگيالىق كورسەتكىشتەردىڭ، قاراستىرىلىپ وتىرعان ماۋسىمداعى كليماتتىق نورمادان اۋىتقۋ (انوماليا) رەتىندە كورسەتىلگەن سيپاتتاماسى؛ ونى كونسۋلتاتيۆتى رەتىندە پايدالانىلۋى ءتيىس، ول قىسقا مەرزىمدىق (توقساندىق ماۋسىمدىق بولجام، اي، ونكۇندىك، اپتا جانە كۇن) بولجامدارمەن ناقتىلانادى.