بۇل تۋرالى ق ر باس پروكۋرورى بەرىك اسىلوۆ ءوزىنىڭ X الەۋمەتتىك جەلىسىندەگى پاراقشاسىندا جازدى.
- بۇگىندە جاسالعان قىلمىسقا دەن قويۋ جەتكىلىكسىز. ءبىزدىڭ ورتاق مىندەتىمىز - قاۋىپ-قاتەردىڭ الدىن الۋ، قۇقىق بۇزۋشىلىقتاردىڭ سەبەپتەرىن جويۋ جانە ازاماتتاردىڭ قۇقىقتارىن ناقتى قورعاۋدى قامتاماسىز ەتۋ. ءدال وسى ماقساتتا ءبىز قىلمىستىق قاتەرلەر مەن قوعامدىق قاۋىپسىزدىك تاۋەكەلدەرىن بولجاۋ ورتالىعىن قۇردىق. ول - قىلمىستىڭ سالدارىمەن كۇرەسۋدەن ونى ەرتە كەزەڭدە ەسكەرتۋگە كوشۋدىڭ نەگىزگى قۇرالدارىنىڭ ءبىرى، - دەپ جازدى باس پروكۋرور.
ونىڭ ايتۋىنشا، ورتالىق تاۋلىك بويى كريمينوگەندىك احۋالدى تالدايدى، ىقتيمال قاۋىپتەر مەن وسال ايماقتاردى انىقتايدى، تاۋەكەلدەردى بولجايدى جانە ولاردىڭ الدىن الۋ بويىنشا ناقتى شارالار ازىرلەيدى. جۇمىستىڭ جەكە باعىتى - قىلمىستىق قاتەرلەردىڭ جاڭا تۇرلەرى مەن تاسىلدەرىن انىقتاۋ ماقساتىندا شەتەلدىك كونتەنتكە مونيتورينگ جۇرگىزۋ. ەڭ باستىسى - بۇل تالداۋ جەرگىلىكتى جەرلەردە ناقتى شەشىمدەر قابىلداۋعا نەگىز بولادى. ماسەلەن، ىشكى ىستەر مينيسترلىگى جانە ءوڭىر اكىمدىكتەرىمەن بىرلەسىپ، جاساندى ينتەللەكت پەن ۇشقىشسىز تەحنولوگيالاردى قولدانۋ ارقىلى ازاماتتارعا قىلمىستىق قول سۇعۋ ىقتيمالدىعى جوعارى 360 تان استام قاۋىپتى لوكاتسيا انىقتالدى. بۇل جەرلەردە پوليتسيانىڭ پاترۋلدەۋى كۇشەيتىلىپ، 4 مىڭعا جۋىق جاڭا جارىقتاندىرۋ نۇكتەسى جانە 3,5 مىڭنان استام بەينەباقىلاۋ كامەراسى ورناتىلدى. مۇنداي ءتاسىل ءوز ناتيجەسىن بەرىپ وتىر.
ءبىرىنشى جارتىجىلدىقتىڭ قورىتىندىسى بويىنشا ەلدەگى قىلمىس دەڭگەيى 11 پايىزعا تومەندەدى. ادام ءولتىرۋ، قاراقشىلىق، توناۋ، قورقىتىپ الۋشىلىق، ۇرلىق جانە كوشەلەردە جاسالاتىن قىلمىستار ازايدى. ەسىرتكى قىلمىسىنا قارسى جۇيەلى ءارى بەلسەندى جۇمىس جالعاسۋدا. «كيبەرنادزور» جۇيەسى ەسىرتكىنى ناسيحاتتاۋ بەلگىلەرى بار 10 مىڭ ماتەريالدى، ونىڭ ىشىندە 6 مىڭنان استام ەسىرتكى دۇكەنىن بۇعاتتادى. پروكۋراتۋرا مەن پوليتسيا ورگاندارىنىڭ ءتيىمدى ءوزارا ءىس-قيمىلى ناتيجەسىندە 464 مىڭنان استام دروپپەرلىك شوت بۇعاتتالىپ، 2,6 ميلليارد تەڭگەدەن استام ەسىرتكىدەن تۇسكەن كىرىسكە تىيىم سالىندى.
سوڭعى جىلدارى العاش رەت ينتەرنەت-الاياقتىقتىڭ ءوسۋ ءۇردىسىن وزگەرتۋگە قول جەتكىزىلدى - ولاردىڭ سانى 9 پايىزعا تومەندەدى. قۇقىق قورعاۋ ورگاندارى مەن «قازاقتەلەكوم» ا ق-نىڭ بىرلەسكەن كۇش-جىگەرىمەن ميلليوننان استام كۇدىكتى قوڭىراۋ توقتاتىلىپ، شەتەلدە ورنالاسقان 12 الاياقتىق كولل-ورتالىقتىڭ قىزمەتى اشكەرەلەندى. ماسەلەن، ەلوردادا پروكۋراتۋرانىڭ باستاماسىمەن وسى بايلانىس وپەراتورىنىڭ بازاسىندا قۇرىلعان انتيكولل-ورتالىق الاياقتاردىڭ قوڭىراۋىن 76 جاستاعى ايەل ولارعا 21 ميلليون تەڭگە بەرۋگە دايىندالىپ جاتقان ساتتە توقتاتتى. ناتيجەسىندە قاراجاتتى ساقتاپ قالۋعا مۇمكىندىك تۋدى. سونىمەن قاتار ۇلتتىق بانكتىڭ انتيفرود- ورتالىعى ارقىلى 2,9 ميلليارد تەڭگەدەن استام سوماعا الاياقتىق ترانزاكتسيالار بۇعاتتالدى.
- وسى سانداردىڭ ارتىندا ناقتى ناتيجە - ازاماتتاردىڭ قورعالعان ءومىرى، دەنساۋلىعى مەن مۇلكى تۇر. ءبىزدىڭ ماقساتىمىز - قاۋىپتىڭ قىلمىسقا اينالۋىن كۇتپەي، ونى الدىن الا انىقتاۋ، سەبەپتەرىن جويۋ جانە سالدارىنىڭ الدىن الۋ. كونستيتۋتسيالىق «زاڭ مەن ءتارتىپ» قاعيداتىن ءىس جۇزىندە جۇزەگە اسىرۋ دەگەنىمىز - وسى. مەملەكەت باسشىسى قاسىم-جومارت توقايەۆ الدىمىزعا ءدال وسىنداي مىندەت قويىپ وتىر، - دەدى بەرىك اسىلوۆ.