بيىلعى اپات كەزىندە اسكەريلەر ەلمەن بىرگە اۋقىمدى جۇمىستىڭ الدىڭعى شەبىنەن تابىلدى - ولجاس بەكتەنوۆ
استانا. KAZINFORM - قازاقستان رەسپۋبليكاسىنىڭ پرەمەر- ءمينيسترى ولجاس بەكتەنوۆ قازاقستان حالقىن وتان قورعاۋشى كۇنىمەن قۇتتىقتادى.
«قۇرمەتتى قازاقستاندىقتار! بارشاڭىزدى وتان قورعاۋشى كۇنىمەن شىن جۇرەكتەن قۇتتىقتايمىن! قاشاندا قايسارلىق پەن اسقاق رۋحتىڭ جارقىن ۇلگىسىن كورسەتىپ كەلە جاتقان ايبىندى ارميامىز - ەلىمىزدىڭ تاۋەلسىزدىگى مەن تۇتاستىعىنىڭ مىزعىماس كەپىلى. مەملەكەت باسشىسى - جوعارعى باس قولباسشى قاسىم-جومارت كەمەل ۇلى توقايەۆتىڭ تىكەلەي قولداۋىمەن بۇگىندە قارۋلى كۇشتەرىمىزدىڭ اسكەري الەۋەتىن جاڭعىرتۋعا، كاسىبي دەڭگەيىن ساپالى دامىتۋعا ەرەكشە نازار اۋدارىلىپ كەلەدى. ءبىز وتان الدىنداعى قاسيەتتى بورىشىنا ادالدىق تانىتقان قاھارماندارىمىزدى ۇدايى ماقتان تۇتامىز» دەيدى ولجاس بەكتەنوۆ مەرەكەلىك لەبىزىندە.
ونىڭ ايتۋىنشا، بيىلعى الاپات تابيعي اپات كەزىندە اسكەري قىزمەتشىلەر دە ەلمەن بىرگە اۋقىمدى جۇمىستاردىڭ الدىڭعى شەبىنەن تابىلعان.
بۇل ورايدا ساربازدارىمىز بەن ساردارلارىمىزدىڭ قاجىرلى ەڭبەكتەرى شەكسىز قۇرمەتكە لايىق.
«اركەز ابىروي بيىگىنەن كورىنىڭىزدەر. وسىناۋ مەرەيلى كۇنى قارۋلى كۇشتەرىمىزدىڭ ارداگەرلەرىنە، ەل تىنىشتىعىن قورعاپ جۇرگەن اسكەري قىزمەتشىلەردىڭ بارلىعىنا مىقتى دەنساۋلىق، شاڭىراقتارىنا باق- بەرەكە تىلەيمىن. ەگەمەن ەلىمىزدىڭ ەڭسەسى بيىك، ىرگەسى بەرىك بولسىن!» دەيدى ۇكىمەت باسشىسى.
ەسكە سالا كەتەيىك، بۇگىن قازاقستاندا وتان قورعاۋشى كۇنى تويلانىپ جاتىر.