بيىل وڭىرلەردەگى كومىردىڭ تونناسى قانشا

استانا. KAZINFORM - ونەركاسىپ جانە قۇرىلىس مينيسترلىگىنىڭ ونەركاسىپ كوميتەتى ءتوراعاسىنىڭ ورىنباسارى تۇرار جولماعامبەتوۆ كومىردىڭ كەنىشتەگى جانە ساتىلىمداعى باعاسىن اتادى.

«بۇگىن كومىردىڭ كەنىشتەگى باعاسىنا توقتالعىم كەلەدى. قازىرگى ۋاقىتتا نەگىزگى جەتكىزۋشىلەردەگى كومىردىڭ ءبىر تونناسى 7,1 مىڭ تەڭگە مەن 9 مىڭ تەڭگەنىڭ ارالىعىندا. ايتالىق، بۇگىندە «شۇباركول كومىردىڭ» 1 تونناسى كەنىشتە 8 مىڭ تەڭگە تۇرادى. وتكەن جىلمەن سالىستىرعاندا 900 تەڭگەگە قىمباتتاعان. بىلتىر تونناسى 7100 تەڭگە بولعان ەدى. شىعىستاعى «قاراجىرادا» بىلتىر تونناسى 8500 تەڭگە بولسا، بيىل 200 تەڭگەگە قىمباتتاپ، 8700 تەڭگەگە جەتتى. ال، وسى ماۋسىمدا «مايكوبەن-ۆەست» كومىرىنىڭ تونناسى 7750 تەڭگەدەن باستالادى. بىلتىر 7100 تەڭگە دەڭگەيىندە بولدى. ءوسىم - 650 تەڭگە. «شۇباركول پرەميۋم» كومىرىنىڭ تونناسى - 9 مىڭ تەڭگە، وزگەرىس جوق. بىلتىر دا وسى باعادا ساتىلعان»، - دەدى ول ورتالىق كوممۋنيكاتسيالار قىزمەتىندەگى بريفينگىدە.

وسى ورايدا تۇرار جولماعامبەتوۆ وڭىرلەرگى كومىردىڭ 1 تونناسى 8 مىڭ مەن 26 مىڭ تەڭگە ارالىعىندا ەكەنىن ايتادى.

«الشاقتىق تىم جوعارى. كەنىشكە تاقاۋ ورنالاسقان ەلدى مەكەندەر سول جەردەن بىردەن بارىپ، تونناسىن 8 مىڭ تەڭگەدەن الىپ كەتەدى. ءبىراق، بىزدە كومىر كەنىشىنەن تىم الىستا ورنالاسقان شالعايداعى وڭىرلەر بار. مۇنىڭ ۇستىنە اتالعان وڭىرلەردە تەمىر جول تۇيىعى دا بولماۋى مۇمكىن. وسىعان بايلانىستى ەلدى مەكەنگە دەيىن جەتكىزۋ جولى ۇزاق بولۋى ىقتيال. سوندىقتان دا باعاسىندا ۇلكەن ايىرماشىلىق بار»، - دەدى كوميتەت ءتوراعاسىنىڭ ورىنباسارى.

ەسكە سالا كەتەيىك، بۇعان دەيىن قازاقستاندا 7-ايدا 58,1 ميلليون توننا كومىر وندىرىلگەنىن جازعان ەدىك.