«قازاقستاننىڭ اۆتوكولىك وداعى» (ق ا و) دەرەگىنشە، 2026 -جىلعى شىلدەدە رەسمي ديلەرلەر 21371 جەڭىل جانە كوممەرتسيالىق اۆتوكولىك ساتقان، بۇل بىلتىرعى شىلدەدەگى
ناتيجەدەن (20179) 5,9 پايىزعا كوپ. قاڭتار- شىلدە قورىتىندىسى بويىنشا 127260 جاڭا اۆتوكولىك ءوتىپ، 2025 -جىلعى سايكەس كەزەڭدەگىدەن 1,7 پايىزعا (125132) جوعارى بولدى.
- قازاقستاننىڭ نارىعى جاڭا اۆتوكولىكتەر ساۋداسىنىڭ جوعارى دەڭگەيىن ساقتاپ تۇر. ءقازىر باسەكەلەستىك ورتا قانشالىقتى تەز ءوسىپ جاتقانى بايقالىپ تۇر. وسى ورايدا ەلدە جاسالاتىن مودەلدەر ورنىن نىعايتىپ، تاڭداۋ مۇمكىندىگى ارتىپ كەلەدى. ال ساتىپ الۋشىلار اۆتوكولىكتىڭ قۇنىن عانا ەمەس، تەحنولوگيالاردى، الۋ شارتتارى مەن ساتىپ العان سوڭ قىزمەت كورسەتۋ ساپاسىن دا مۇقيات باعالايدى، - دەدى ق ا و پرەزيدەنتى انار ماقاشيەۆا.
جازدا قاي كولىك ءتۇرى ءوتىمدى بولدى؟
اتاپ ايتقاندا، 2026 -جىلعى شىلدەدە Hyundai ديلەرلەرى 3712 اۆتوكولىك ساتىپ، بىلتىرعى شىلدەدەگى ناتيجەسىن قايتالادى ( 0,4 پايىز). ەكىنشى ورىنعا 2855 اۆتوكولىك ناتيجەسىمەن Chevrolet جايعاستى (-29,5 پايىز). ءۇشىنشى ورىندا Kia تۇر، ونىڭ ساۋداسى 14,8 پايىز ءوسىپ، 2492 اۆتوكولىككە جەتكەن. Changan-نىڭ كورسەتكىشى Kia عا جاقىن - 2456 اۆتوكولىك ساتىلدى. برەند ساۋداسى بىلتىرعى شىلدەمەن سالىستىرعاندا بىردەن 171,7 پايىز وسكەن. العاشقى بەستىكتى Chery تۇيىندەدى، ماركا 1543 اۆتوكولىك ساتىپ، 2025 -جىلعى كورسەتكىشتەن 35,6 پايىز جوعارى ناتيجە كورسەتتى.
سونىمەن قاتار العاشقى وندىققا Jetour (1129 كولىك؛ -14,5 پايىز)، Toyota (1019؛ 8,1 پايىز)، JAC (994؛ -10,5 پايىز)، Geely (868؛ 73,3 پايىز) جانە Haval (864 كولىك؛ -16,6 پايىز) ەندى.
مودەلدەر اراسىندا شىلدەدە Chevrolet Cobalt كوش باسىنا شىقتى - 2682 اۆتوكولىك. ەكىنشى ورىنعا Hyundai Tucson (1851 كولىك) تۇراقتادى، ال 1070 اۆتوكولىك ساتىلعان Changan CS35 MAX العاش رەت ەڭ كوپ وتكەن ءۇش مودەل قاتارىنا ەندى.
بۇدان بولەك، شىلدەدە Kia Cerato ەڭ تانىمال اۆتوكولىكتەر اراسىنا قايتا قوسىلدى، ياعني ديلەرلەر 1031 اۆتوكولىك ساتىپ، بۇل مودەلدىڭ بىردەن ءتورتىنشى ورىنعا كوتەرىلۋىنە مۇمكىندىك بەردى. ۇزدىك بەستىكتى Kia Sportage تۇيىندەدى - 820 اۆتوكولىك.
جالپى، جەتى اي قورىتىندىسى بويىنشا 20959 اۆتوكولىك ناتيجەسىمەن Hyundai ءبىرىنشى ورىن الدى (-24,7 پايىز). Chevrolet ەكىنشى - 20441 اۆتوكولىك، بۇل 2025 قاڭتار- شىلدەمەن سالىستىرعاندا 17,8 پايىز جوعارى كورسەتكىش.
ءۇشىنشى ورىندا Kia - 14824 اۆتوكولىك ( 9,9 پايىز). ءتورتىنشى ساتىعا ساۋداسىن ەكى ەسە ۇلعايتىپ، 11927 اۆتوكولىككە دەيىن جەتكىزگەن Changan كوتەرىلدى ( 101,8 پايىز).
كوشباسشىلار بەستىگىن Chery تۇيىندەدى - 9686 اۆتوكولىك ( 14,6 پايىز). سودان كەيىن تىزىمدە Haval (7590 كولىك؛ 11,2 پايىز)، Jetour (6903؛ -19,4 پايىز)، JAC (5739؛ -1,7 پايىز)، Toyota (5016؛ -8,8 پايىز) جانە Geely (3794؛ -34,3 پايىز) تۇر.
بيىل ەلدە 190 مىڭ اۆتوكولىك شىعارىلادى
ونەركاسىپ جانە قۇرىلىس ءمينيسترى ەرسايىن ناعاسپايەۆتىڭ ايتۋىنشا، اۆتوكولىك ءوندىرىسى سالاسى قارقىندى دامىپ كەلە جاتىر.
اتاپ ايتقاندا، كەيىنگى 5 جىلدا سالاعا 457 ميلليارد تەڭگەگە جۋىق ينۆەستيتسيا تارتىلدى. بىلتىر 171 مىڭنان استام اۆتوكولىك شىعارىلىپ، ءوندىرىس كولەمى 18 پايىزعا ارتتى.
- بۇل وڭ ديناميكا بيىل دا ساقتالادا. وسى جىلدىڭ 6 ايىندا 94400 كولىك شىعارىلدى، بۇل وتكەن جىلمەن سالىستىرعاندا 35 پايىزعا جوعارى. بيىلعى جوسپار - ءوندىرىس كولەمىن 11 پايىزعا ارتتىرىپ، 190 مىڭ كولىك شىعارۋ. جالپى بيىل اۆتوموبيل شىعارۋ سالاسى 131,1 پايىزعا ءوستى، - دەدى مينيستر.
ەرسايىن ناعاسپايەۆتىڭ مالىمدەۋىنشە، وتاندىق اۆتوموبيل ونەركاسىبىن ودان ءارى دامىتۋ جانە ونىڭ باسەكەگە قابىلەتتىلىگىن ارتتىرۋ ماقساتىندا مينيسترلىك نەگىزگى باعىتتاردى ايقىندادى. ولار:
- لوكاليزاتسيا دەڭگەيىن ودان ءارى ارتتىرۋ. ول ءۇشىن نەگىزگى باسىمدىق - جاڭا اۆتوكومپونەنتتەر ءوندىرىسىن يگەرۋگە جانە وتاندىق كاسىپورىنداردى الەمنىڭ جەتەكشى اۆتوكولىك كومپانيالارىنىڭ ءوندىرىس تىزبەكتەرىنە ەنگىزۋ جوسپارلانىپ وتىر.
- حالىق ءۇشىن اۆتوكولىكتىڭ قولجەتىمدىلىگىن ارتتىرۋ. وسى ماقساتتا اۆتونەسيەلەۋ مەن ليزينگ تەتىكتەرىن جەتىلدىرۋ، ونىڭ ىشىندە بورىشتىق جۇكتەمە كوەففيتسيەنتىن الىپ تاستاۋ جانە جەكە ادامدارعا ارنالعان اۆتوليزينگتى دامىتۋ كوزدەلگەن.
- ەلەكتر جانە گيبريدتى كولىك قۇرالدارى ءوندىرىسىن دامىتۋ، سونداي- اق ولاردى پايدالانۋعا قاجەتتى ينفراقۇرىلىمدى قالىپتاستىرۋ. بۇل زاريادتاۋ ستانتسيالار جەلىسىن كەڭەيتۋدى، پيلوتسىز كولىك تەحنولوگيالارىن قولدانۋ ءۇشىن قاجەتتى جاعدايلار جاساۋدى قامتيدى.
- اۆتوكولىكتەردى يمپورتتاۋ كەزىندە زاڭناما تالاپتارىن ساقتاۋدى قامتاماسىز ەتۋ. بۇل وتاندىق وندىرۋشىلەر مەن يمپورتتاۋشىلار ءۇشىن تەڭ ءارى اشىق باسەكەلەستىك جاعدايلارىن قالىپتاستىرۋعا، سونداي-اق زاڭسىز سحەمالاردى بولدىرماۋعا مۇمكىندىك بەرەدى.
- مەنشىكتى زەرتحانالىق بازانى قۇرۋ. بۇل اۆتوكولىك پەن اۆتوكومپونەنتتەردىڭ تەحنيكالىق تالاپتارعا سايكەستىگىن ەل ىشىندە راستاۋعا، جاڭا ونىمدەردى نارىققا جەدەل شىعارۋعا جانە وتاندىق ءوندىرىستىڭ دامۋىنا ىقپال ەتەدى.