بيىل قاي سىنىپتىڭ وقۋلىقتارىنا جاڭارتۋ جاسالدى؟ مينيسترلىك جاۋابى

استانا. قازاقپارات - بيىلعى وقۋ جىلىندا قاي سىنىپتىڭ وقۋلىقتارىنا جاڭارتۋ جاسالدى، وقۋلىقتار جەتكىلىكتى مە؟ Massaget.kz ءتىلشىسى وسى ماسەلە بويىنشا وقۋ-اعارتۋ مينيسترلىگىنە رەسمي ساۋال جولداعان ەدى.

مينيسترلىكتىڭ مالىمەتىنشە، 2024-2025 وقۋ جىلىنا وقۋلىقتاردى ساتىپ الۋ ءۇشىن بارلىق جەرگىلىكتى اتقارۋشى ورگاندار 20 باسپامەن كەلىسىمشارت جاساعان. ولاردىڭ ىشىندە «الماتى كىتاپ»، «مەكتەپ»، «اتامۇرا»، «ارمان- پ ۆ»، «نازاربايەۆ زياتكەرلىك مەكتەپتەرى»، «استانا- كىتاپ»، «كەلەشەك-2030»، «جازۋشى»، «ساپالى ءبىلىم»، Macmillan Education، «كونسالتينگ»، Nur- Sultan Baspasy ،MM Publications ،Express Publishing, Oxford ،University Press ،Huebert Verlag، «سەنتر ساتر»، «ءال- ناير»، «كوكجيەك- گوريزونت»، Cambridge UP باسپالارى بار.

قاي سىنىپتىڭ وقۋلىقتارى جاڭالانادى؟

2024-2025 وقۋ جىلىندا جاڭا وقۋ باعدارلامالارىن ەنگىزۋگە بايلانىستى ءبىلىم بەرۋ ۇيىمدارىندا قازاق تىلىندە وقىتاتىن بىرنەشە سىنىپتىڭ وقۋلىعى جاڭارتىلىپ، ساتىپ الىنعان.

«اتاپ ايتساق، ءۇشىنشى سىنىپتار ءۇشىن «ورىس ءتىلى»، «اعىلشىن ءتىلى»، «نەمىس ءتىلى»، «فرانسۋز ءتىلى»، «ەڭبەككە باۋلۋ»، «بەينەلەۋ ونەرى»، «سيفرلىق ساۋاتتىلىق» (ەلەكتروندى وقۋلىق)، 5-9-سىنىپتار ءۇشىن - «جاھاندىق قۇزىرەتتەر»، 9-11-سىنىپتار ءۇشىن - «نەمىس ءتىلى» پاندەرى بويىنشا وقۋلىقتار مەن وقۋ-ادىستەمەلىك كەشەندەر تولىق كولەمدە جاڭارتىلىپ ساتىپ الىندى. ال 3-سىنىپقا - «جاراتىلىس تانۋ»، 7-سىنىپقا - «قازاق ءتىلى»، 8-سىنىپقا - «دۇنيەجۇزى تاريحى»، 9-سىنىپقا - «قازاقستان تاريحى»، «قازاقستان گەوگرافياسى» وقۋلىقتارى قايتا باسىلىپ شىقتى»، - دەلىنگەن مينيسترلىك جولداعان جاۋاپتا.

وقۋلىقتار وڭىرلەردە جەتكىلىكتى مە؟

مينيسترلىكتىڭ مالىمەتىنشە، قازىرگى تاڭدا رەسپۋبليكا بويىنشا جاڭا باسىپ شىعارىلعان وقۋلىقتارمەن بارلىق وڭىرلەر تولىقتاي قامتاماسىز ەتىلدى. جاڭا وقۋ جىلىندا جاڭا تيپتىك وقۋ جوسپارلارىنا سايكەس كەيبىر پاندەر بويىنشا وقۋلىقتار ازىرلەنىپ، وقۋ پروتسەسىنە ەنگىزىلگەن.

«ماسەلەن، 3-سىنىپتىڭ «جاراتىلىس تانۋ»، «ەڭبەككە باۋلۋ»، «بەينەلەۋ ونەرى»، «ورىس ءتىلى» (قازاق مەكتەپتەرىنە)، «سيفرلىق ساۋاتتىلىق»، «شەت تىلدەرى» (اعىلشىن، نەمىس، فرانسۋز) جانە 5-9-سىنىپتار ارنالعان «جاھاندىق قۇزىرەتتەر» فاكۋلتاتيۆتىك كۋرسى بويىنشا وقۋلىقتار مەن وقۋ-ادىستەمەلىك كەشەندەر ازىرلەنىپ، قولدانىلادى. سونىمەن بىرگە 7-سىنىپتىڭ «قازاق ءتىلى»، 9-سىنىپتىڭ «قازاقستان تاريحى»، «قازاقستان گەوگرافياسى»، 8-سىنىپتىڭ «دۇنيەجۇزى تاريحى» وقۋلىقتارىنىڭ مازمۇنىنا وزگەرىستەر مەن تولىقتىرۋلار ەنگىزىلىپ، قايتا باسىلىپ شىعارىلدى»، - دەلىنگەن رەسمي جاۋاپتا.