بيىل قانشا ادامعا ەلەكتروندى بىلەزىك تاعىلدى

استانا. KAZINFORM -جوعارعى سوت ەلەكتروندىق بىلەزىكتەردى قولدانۋدى كەڭەيتتى. ستاتيستيكا بويىنشا قازاقستاندا جىل سايىن 11 مىڭعا جۋىق ادام سوتقا دەيىن قاماۋعا الىنادى.

تەرگەۋ ورگاندارىنىڭ اۋىر جانە اسا اۋىر قىلمىستار بويىنشا كۇدىكتىلەردى قاماۋدا ۇستاۋعا سانكتسيا بەرۋ تۋرالى وتىنىشتەرىنىڭ سانى 30 پايىزعا ءوستى. بۇل جاعداي تەرگەۋگە قاماۋعا الىنعان ادامداردى ازايتۋعا جانە بالامالى بۇلتارتپاۋ شارالارىن كەڭەيتۋگە قاتىستى قازاقستان قابىلداعان باعىتقا جاۋاپ بەرمەيدى.

كۇدىكتىنى نەمەسە ايىپتالۋشىنى باقىلاۋدىڭ ءتيىمدى ادىستەرىنىڭ ءبىرى - بۇكىل الەمدە كەڭىنەن قولدانىلاتىن ەلەكتروندى باقىلاۋ جۇيەسى (ەلەكتروندى بىلەزىكتەر). بۇل كۇدىكتىنىڭ تەرگەۋ مەن سوتتان جاسىرىنىپ، قىلمىستىق ارەكەتتەرمەن اينالىسۋىن جالعاستىرادى دەگەن الاڭداۋشىلىقتى بولدىرماۋعا مۇمكىندىك بەرەدى.

بۇل قىلمىستىق قۋدالاۋ وربيتاسىنا قاتىساتىن ادامدار ءۇشىن سالىستىرمالى تۇردە ارزان جانە ءتيىمدى نۇسقا. تەرگەلەتىندەرگە ەلەكتروندىق مونيتورينگ جۇيەلەرىن قولدانۋ جانە ولارعا قىزمەت كورسەتۋ مەملەكەت ءۇشىن ولاردى تەرگەۋ يزولياتورىندا ۇستاۋعا قاراعاندا ارزانىراق. سونىمەن قاتار بۇل ادامدار ءومىر سالتىن ساقتاپ، الەۋمەتتىك بايلانىستاردى قولداي وتىرىپ، جۇمىسىن جالعاستىرا الادى.

بيىل ساۋىردە جوعارعى سوتتىڭ باستاماسىمەن وتكىزىلگەن ۆەدومستۆوارالىق كەڭەستەن كەيىن ەلوردادا پيلوتتىق جوبا باستالدى. ونىڭ اياسىندا ەلەكتروندى باقىلاۋدى قولدانۋ كەڭەيدى. وسى كەزەڭدە تەرگەۋ سوتى تەرگەۋ ورگاندارىنا 26 كۇدىكتىنى قاماۋعا الۋدان باس تارتتى. ونىڭ ورنىنا، ولارعا قاتىستى بۇلتارتپاۋ شاراسى - ەلەكتروندى بىلەزىكتەر تاعۋمەن ءۇي قاماعىنا الۋ تاڭدالدى.

ەلەكتروندىق باقىلاۋ قۇرالدارىن قولدانۋدىڭ نەگىزگى ۇلەسى سىبايلاس جەمقورلىققا قارسى قىزمەت تەرگەپ- تەكسەرەتىن ىستەر بويىنشا - 14 (پوليتسيا دەپارتامەنتى – 10، ەكونوميكالىق تەرگەۋ دەپارتامەنتى-2). بۇل رەتتە، ق ك- ءنىڭ 106-بابىنىڭ 1-ءبولىمى، 190-باپتىڭ 1,3-بولىمدەرى، 296-باپتىڭ 4-ءبولىمى، 297-باپتىڭ 3-ءبولىمى، 299-1-باپتىڭ 1,2- ءبولىمى بويىنشا پوليتسيا ورگاندارىمەن تەرگەلىپ جاتقان ىستەر بويىنشا ەلەكتروندى قۇرالدار قولدانىلدى.

بىلەزىكتەردى قولدانۋ الگوريتمى جاسالدى. جوعارعى سوت ەلوردالىق سوتتىڭ وڭ تاجىريبەسىن رەسپۋبليكالىق دەڭگەيدە تاراتۋدى جوسپارلاپ وتىر. بۇل قاماۋعا الىنعاندار سانىن ازايتادى.

قابىلدانىپ جاتقان شارالار ەل پرەزيدەنتىنىڭ قىلمىستىق پروتسەستە جەكە تۇلعانىڭ كونستيتۋتسيالىق قۇقىقتارى مەن بوستاندىقتارىن قامتاماسىز ەتۋ تۋرالى تاپسىرمالارىنا تولىق سايكەس كەلەدى.