بيىل قانداي ماماندىقتارعا گرانت كوپ بولىنەدى؟
استانا. قازاقپارات - 2025-جىلى ەڭ كوپ ءبىلىم گرانتى تەحنيكالىق ماماندىقتارعا بولىنەدى. بۇل تۋرالى عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ ءمالىم ەتتى.
ءسوز باسىندا ۆيتسە-مينيستر ەلدە اتوم ەلەكتر ستانتسياسىن (ا ە س) سالۋ جوسپارىنا بايلانىستى يادرولىق فيزيكا سالاسىنداعى كادرلاردى دايارلاۋ قاجەتتىلىگى تۋىنداپ وتىرعانىن اتاپ ءوتتى.
قازىرگى تاڭدا ا ە س- كە قاتىستى گرانت ماسەلەسىن قالىپتاستىرىپ جاتىرمىز. تەحنيكالىق ۋنيۆەرسيتەتتەردىڭ وقۋ باعدارلامالارى مەن مۇمكىندىكتەرى ەسكەرىلەدى. الداعى ۋاقىتتا قانشا ماماندىققا قاجەتتىلىك تۋىندايتىنىن تولىق باعامداي كەلە، گرانتتار سانى بەلگىلەنەدى، - دەدى تالعات ەشەنقۇلوۆ.
ونىڭ مالىمەتىنشە، ا ە س ءۇشىن ارنايى جاڭا وقۋ ورنى اشىلمايدى. سەبەبى ەلىمىزدە تەحنيكالىق باعىتتا ءبىلىم بەرەتىن 122 جوعارى وقۋ ورنى بار. ولاردىڭ ىشىندە يادرولىق فيزيكا ماماندىعى بويىنشا ءبىلىم بەرەتىن ءىرى ۋنيۆەرسيتەتتەر دە بار.
ولاردىڭ ءارقايسىسىنىڭ وقۋ باعدارلاماسى ءارتۇرلى. وقۋ ورىندارىنىڭ ءبىلىم ساپاسىنا جانە ينفراقۇرىلىمىنا بايلانىستى شەشىم قابىلدانادى، - دەيدى ۆيتسە-مينيستر.
ال قاي ماماندىققا كوپ گرانت بولىنەدى دەگەن ساۋالعا:
بيىل تەحنيكالىق ماماندىقتارعا سۇرانىستىڭ جوعارى بولۋىنا بايلانىستى گرانت سانى كوبىرەك بولادى، - دەپ جاۋاپ بەردى ۆيتسە-مينيستر.