بيىل مۇگەدەكتىگى بويىنشا جانە اسىراۋشىسىنان ايىرىلعاندارعا قانشا جاردەماقى تولەندى؟

قازاقستاندىقتارعا مۇگەدەكتىگى جانە اسىراۋشىسىنان ايىرىلۋى بويىنشا جاردەماقىلار مەن الەۋمەتتىك تولەمدەر تۇرىندە شامامەن 484,3 ميلليارد تەڭگە تولەندى، - دەپ حابارلايدى ەڭبەك جانە حالىقتى الەۋمەتتىك قورعاۋ مينيسترلىگى.

«جىل باسىنان بەرى مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردى (م ءا ج) تولەۋگە رەسپۋبليكالىق بيۋدجەتتەن 431 ميلليارد تەڭگە جۇمسالدى. بۇعان قوسىمشا مەملەكەتتىك الەۋمەتتىك ساقتاندىرۋ قورىنان (بۇدان ءارى –م ءا س ق) ەڭبەككە قابىلەتتىلىگىنەن ايىرىلۋ جانە اسىراۋشىسىنان ايىرىلۋ بويىنشا شامامەن 53,3 ميلليارد تەڭگە سوماسىنا الەۋمەتتىك تولەمدەر تولەندى»، - دەلىنگەن حابارلامادا.

2023-جىلعى 1- قاراشاداعى جاعداي بويىنشا، مۇگەدەكتىگى بويىنشا م ءا ج الۋشىلار سانى شامامەن 537 مىڭ ادام، اسىراۋشىسىنان ايىرىلۋ جاعدايى بويىنشا شامامەن 176,1 مىڭ ادام بولعان.

«مۇگەدەكتىگى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىكتىڭ توبىنا جانە سەبەبىنە، سونداي-اق، ءتيىستى قارجى جىلىنا ارنالعان «رەسپۋبليكالىق بيۋجەت تۋرالى» زاڭدا بەلگىلەنگەن ەڭ تومەن كۇنكورىس دەڭگەيىنىڭ شاماسىنا بايلانىستى بولادى.

اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى قايتىس بولعان اسىراۋشىنىڭ اسىراۋىنداعى ادامداردىڭ سانىنا، قايتىس بولۋ سەبەپتەرىنە جانە ەڭ تومەن كۇنكورىس دەڭگەيىنە بايلانىستى بولادى»، - دەلىنگەن حابارلامادا.

سونىمەن قاتار، مۇگەدەكتىگى بويىنشا جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى 2023-جىلعى 1- قاڭتاردان باستاپ ەڭ تومەن كۇنكورىس دەڭگەيىنىڭ ۇلعايۋىنا بايلانىستى 8,5 پايىزعا وسكەن، 2023-جىلعى 1- شىلدەدەن باستاپ ورتاشا ەسەپپەن 14,5 پايىزعا قوسىمشا كوبەيگەن.

«ماسەلەن، 2023-جىلعى 1- شىلدەدەن باستاپ جالپى اۋرۋلاردان مۇگەدەكتىگى بويىنشا م ءا ج مولشەرى 1-توپ ءۇشىن - 89248 تەڭگە، 2-توپ ءۇشىن - 71398 تەڭگە، 3-توپ ءۇشىن - 48681 تەڭگە بولادى.

بۇدان باسقا، مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا الەۋمەتتىك تاۋەكەلدەر تۋىنداعان جاعدايدا م ءا س ق- تان الەۋمەتتىك تولەمدەر تولەنەدى. ماسەلەن، بيىلعى 10 ايدىڭ قورىتىندىسى بويىنشا 97,5 مىڭ ادام ەڭبەك ەتۋ قابىلەتىنەن ايىرىلۋ بويىنشا الەۋمەتتىك تولەم، ال 62,4 مىڭعا جۋىق وتباسى اسىراۋشىسىنان ايىرىلۋ بويىنشا الەۋمەتتىك تولەم الدى»، - دەلىنگەن حابارلامادا.

تولەمدەردىڭ مولشەرى جەكە جانە مىنالارعا بايلانىستى: كەيىنگى 2 جىلداعى م ءا س ق- قا الەۋمەتتىك اۋدارىمدار جۇرگىزىلگەن ورتاشا ايلىق تابىس، ەڭبەككە قابىلەتتىلىگىنەن ايىرىلۋ كوەففيتسيەنتتەرى، اسىراۋىنداعى ادامدار سانى، مىندەتتى الەۋمەتتىك ساقتاندىرۋ جۇيەسىنە قاتىسۋ ءوتىلى جانە تابىستى اۋىستىرۋ.

«بۇل تولەمدەر رەسپۋبليكالىق بيۋجەتتەن تولەنەتىن ۇقساس جاردەماقىلارعا قوسىمشا جۇزەگە اسىرىلادى، سونداي-اق، 2023-جىلعى 1- شىلدەدەن باستاپ ق ر ۇكىمەتىنىڭ شەشىمىمەن ولاردىڭ مولشەرى 14,5 پايىزعا ۇلعايتىلدى.

1- قاراشاداعى جاعداي بويىنشا ەڭبەككە قابىلەتتىلىگىنەن ايىرىلۋ بويىنشا الەۋمەتتىك تولەمدەردىڭ ورتاشا مولشەرى 35671 تەڭگە، اسىراۋشىسىنان ايىرىلۋ بويىنشا 36800 تەڭگە بولدى»، - دەلىنگەن حابارلامادا.