بيىل ماس كۇيدە كولىك ايداۋ سالدارىنان 26 ادام قازا تاپتى
استانا. KAZINFORM - جىل باسىنان بەرى ماس كۇيدە كولىك تىزگىندەۋ سالدارىنان 178 جول اپاتى بولىپ، 26 ادام قازا تاپقان. ق ر ىشكى ىستەر مينيسترلىگىنىڭ رەسمي وكىلى شىڭعىس الەكەشيەۆ جارتى جىلدىق جۇمىس ەسەبىنىڭ قورىتىندىسىن باياندادى.
ىشكى ىستەر مينيسترلىگى «قورعاۋ» باعدارلاماسىن ازىرلەگەن بولاتىن. ول پوليتسياعا جولدا ورەسكەل زاڭ بۇزاتىن جۇرگىزۋشىلەردى انىقتاۋعا جانە ولارمەن الدىن الۋ جۇمىستارىن جۇرگىزۋگە مۇمكىندىك بەرەدى. مۇنداي باعدارلاما بارلىق 20 ايماقتا قولدانىلادى.
«بيىل «قورعاۋدىڭ» كومەگىمەن 339 مىڭنان استام كولىك قۇرالى تەكسەرىلىپ، 20 مىڭنان استام اكىمشىلىك قۇقىقبۇزۋشىلىق انىقتالدى. 9 مىڭعا جۋىق اۆتوكولىك ايىپپۇل تۇراعىنا قامالدى. جالعان ءنومىرلى 173 كولىك انىقتالدى»، - دەدى شىڭعىس الەكەشيەۆ.
سونىمەن بىرگە، پوليتسيا جۇرگىزۋشىلەر ءتارتىبىن نىعايتۋ بويىنشا دا شارالار قابىلداعان.
«سوڭعى 6 ايدا 12 مىڭنان استام ماس جۇرگىزۋشى ۇستالىپ، جۇرگىزۋ قۇقىعىنان ايىرىلدى. جىل باسىنان بەرى ءدال وسى ماس كۇيدە كولىك تىزگىندەۋدىڭ سالدارىنان 178 جول-كولىك وقيعاسى ورىن الىپ، 26 ادام قازا تاپتى»، - دەدى رەسمي وكىل.
بۇعان دەيىن ش. الەكەشيەۆ ەلىمىزدە ءبىرقاتار قىلمىستىڭ تومەندەۋى بايقالعانىن ايتقان ەدى.