بيىل ەلىمىزدە ءاز-ناۋرىز قالاي تويلانادى
استانا. KAZINFORM - بيىل ءاز-ناۋرىزدىڭ بىرەگەي لوگوتيپى بەكىتىلىپ، ەلىمىزدىڭ بارلىق ايماعىنا جىبەرىلدى. ەلىمىزدىڭ تۇكپىر-تۇكپىرىندە ءتۇرلى مادەني-سپورتتىق ءىس-شارالار وتكىزىلىپ، مەيرامنىڭ ماعىناسى ايشىقتالا تۇسپەك.
ورتالىق كوممۋنيكاتسيالار قىزمەتىندە وتكەن بريفينگىدە ق ر مادەنيەت جانە اقپارات مينيسترلىگى مادەنيەت كوميتەتى ءتوراعاسىنىڭ ورىنباسارى ءسابيت بارلىبايەۆ ءاز-ناۋرىزدى تويلاۋدىڭ ءىس-شارالارىمەن ءبولىستى.
ونىڭ ايتۋىنشا، تاريحتا ناۋرىزدى تويلاۋ 8-9 كۇنگە جالعاسقان. ونى «ناۋرىزناما» دەپ اتاعان. بۇل تۋرالى دەرەكتەر ۇلى فيلوسوف-جازۋشىلارىمىز ماحمۇد قاشقاريدىڭ، ءماشھۇر ءجۇسىپ كوپەي ۇلىنىڭ، اباي قۇنانباي ۇلىنىڭ، مۇحتار اۋەزوۆتىڭ ەڭبەكتەرىندە جازىلعان.
«14- ناۋرىز كورىسۋ كۇنى - امال مەرەكەسى دەپ اتالادى. بۇل ءداستۇر نەگىزىندە ەلىمىزدىڭ باتىس وڭىرلەرىندە ساقتالعان. بۇگىندە اتالعان مەرەكەنى بارلىق ايماقتاردا تويلاۋ ۇسىنىلدى. حالىق ءۇشىن بۇل - قاستەرلى ءارى ورنى ەرەكشە ءداستۇر. 15- ناۋرىز «قايىرىمدىلىق كۇنى» ەتىپ بەلگىلەندى. بۇل كۇندى ەل بويىنشا قايىرىمدىلىققا، مەيىرىم مەن تاتۋ كورشىلىككە ارنايمىز. قوعامعا قايىرىمدىلىق كورسەتۋ مادەنيەتىن ءسىڭىرىپ، جاناشىرلىق پەن ءوزارا قول ۇشىن بەرۋ قۇندىلىقتارىن قالىپتاستىرۋىمىز قاجەت. 16- ناۋرىز «مادەنيەت جانە ۇلتتىق سالت-ءداستۇر كۇنى» ەتىپ بەلگىلەندى. بۇل كۇن مادەنيەتىمىزدى، ونەرىمىز بەن ۇلتتىق قۇندىلىقتارىمىزدى ناسيحاتتاۋعا ارنالىپ، رەسپۋبليكا بويىنشا ءتۇرلى ءىس-شارالاردى وتكىزۋ جوسپارلانۋدا»، - دەدى س. بارلىبايەۆ.
ال، 17- ناۋرىز «شاڭىراق كۇنى» بولىپ بەلگىلەندى. وسى كۇنى وتباسىلىق قۇندىلىقتاردى دارىپتەگەن، ونەگەلى ۇرپاق تاربيەلەگەن ۇلگىلى وتباسىلارعا ارنالعان مادەني ءىس-شارالار وتەدى. 18- ناۋرىز كۇنى ۇلتتىق كيىمدەرگە ارنالادى. ناۋرىزنامانىڭ ون كۇندىگىندە ەلىمىزدىڭ بارلىق وڭىرىندە ۇلتتىق كيىمدەردى ناسيحاتتاۋعا باعىتتالعان ءتۇرلى ءىس-شارا وتكىزۋ ۇسىنىلىپ وتىر.
«19- ناۋرىز - جاڭارۋ كۇنى. وسى كۇنى كوكتەمگى اعاش ەگۋ ءداستۇرىن جالعاستىرۋ ۇسىنىلدى. 20- ناۋرىز ۇلتتىق سپورت كۇنى ەتىپ بەلگىلەندى. بۇل كۇنى ەلدىڭ بارلىق ايماقتارىندا ۇلتتىق سپورتتان ءتۇرلى جارىستار ۇيىمداستىرىلادى. ەل ىشىندە وتكىزىلەتىن ات جارىستار - بايگە، كوكپار، اۋدارىسپاق، جامبى اتۋ، تەڭگە ءىلۋ، قۇسبەگىلىك جانە اسىق اتۋ، توعىزقۇمالاق، ساداق تارتۋ تۋرنيرلەرى قاراپايىم حالىقتىڭ شىنايى مەرەكە سالتاناتىن سەزىنۋىنە مۇمكىندىك بەرەدى»، - دەدى سپيكەر.
21- ناۋرىز ىنتىماق كۇنى دەپ جاريالانعان. ونىڭ باستى ماقساتى - جالپى حالىق اراسىندا ءبىر-بىرىنە دەگەن سىي-قۇرمەتتى ارتتىرىپ، تاتۋلىق پەن بىرلىكتى ناسيحاتتاۋ.
22- ناۋرىز - جىل باسى. بۇل كۇنى ەلىمىزدىڭ بارلىق وڭىرىندە جالپىحالىقتىق مادەني- سپورتتىق ءىس- شارالار وتكىزىلىپ، ستيلدى ەتنواۋىلدار مەن ءتۇرلى جارمەڭكە ۇيىمداستىرىلادى. 14-23- ناۋرىز ارالىعىندا «ناۋرىز-بازارلىق» ماۋسىمى جاريالانادى. بۇل كۇندەرى ساۋدا ورىندارىندا جاپپاي ساتىلىمدار وتەدى.
«ال، ناۋرىزنامانىڭ قورىتىندى كۇنى، جاڭا جىلدى تۇتاس ەل بولىپ، جاڭا ماقسات، جاڭا ۇمىتپەن قارسى الۋدىڭ سيمۆولى رەتىندە 23- ناۋرىز تازارۋ كۇنى ەتىپ جاريالانادى. بۇل كۇنى قازاقستاننىڭ بارلىق ايماقتارىندا جالپىۇلتتىق ەكولوگيالىق اكسيا وتەدى»، - دەدى س. بارلىبايەۆ.
سونىمەن قاتار مادەنيەت جانە اقپارات مينيسترلىگى ناۋرىز مەرەكەسىن تويلاۋعا ارنالعان جالپى رەسپۋبليكالىق جوسپار ازىرلەگەن. قۇجاتتا بارلىق فورماتتاعى ءىس-شارالار قامتىلعان. جالپى رەسپۋبليكا بويىنشا 10 مىڭنان استام ءىس-شارا وتكىزىلەدى. ال، باستى مەرەكە 21- ناۋرىز كۇنى استانا قالاسىنداعى ەكسپو كورمەسىنىڭ اۋماعىندا وتەدى. مەرەكە اياسىندا كيىز ۇيلەر قۇرىلىپ، ءتۇرلى مادەني-سپورتتىق ءىس-شارالار ۇيىمداستىرىلادى. قازىرگى تاڭدا مەرەكەنىڭ تۇجىرىمداماسى بەكىتىلىپ، دايىندىق جۇرگىزىلىپ جاتىر.