بيىل ەلىمىزدە 88 مىڭنان استام تىركەلمەگەن SIM كارتا تاركىلەندى

استانا. KAZINFORM - جىل باسىنان بەرى ەل اۋماعىندا 74 قۇرىلعى مەن 88 مىڭنان اسا تىركەلمەگەن SIM كارتا تاركىلەندى. بۇل تۋرالى ىشكى ىستەر مينيسترلىگى كيبەرقىلمىسقا قارسى ءىس-قيمىل دەپارتامەنتىنىڭ باستىعى جاندوس ءسۇيىنباي ءمالىم ەتتى.

- بايلانىس وپەراتورلارىمەن بىرلەسىپ، تىركەلمەگەن SIM كارتالاردى ينتەرنەت ارقىلى قوڭىراۋ شالۋعا جانە انونيمدى اككاۋنتتار اشۋعا پايدالاناتىن SIM بوكستار انىقتالىپ جاتىر. بيىل ەل اۋماعىندا 74 قۇرىلعى مەن 88 مىڭنان اسا تىركەلمەگەن SIM كارتا تاركىلەندى. اتاپ ايتقاندا، استانا، الماتى، قاراعاندى، اتىراۋ جانە سەمەي قالاسىنان تابىلدى، - دەدى جاندوس ءسۇيىنباي ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ءى م م وكىلىنىڭ مالىمدەۋىنشە، تىركەلمەگەن SIM كارتانى پايدالانۋ ارەكەتىنە قاتىستى 30 كۇدىكتى قاماۋعا الىندى، ونىڭ 14 ءى شەتەل ازاماتى.

- ينتەرنەت كەڭىستىگىنە تۇراقتى تۇردە مونيتورينگ جۇرگىزىلىپ وتىرادى، ناتيجەسىندە زاڭعا قايشى مازمۇنداعى 59 مىڭ ينتەرنەت-رەسۋرس انىقتالىپ، بۇعاتتاۋعا جولداندى. جاعدايدى تۇراقتاندىرۋ جانە جۇمىس ساپاسىن ارتتىرۋ ماقساتىندا توقسان سايىن رەسپۋبليكالىق جەدەل پروفيلاكتيكالىق ءىس-شارا وتكىزىلىپ تۇرادى، - دەپ تولىقتىردى ۆەدومستۆو وكىلى.