بيىل كۇزدە كيىك اۋلاۋعا قايتا رۇقسات بەرىلەدى - ۆيتسە-مينيستر

سامارقان. KAZINFORM - بيىل كۇزدە قازاقستاندا كيىك اتۋعا قايتا رۇقسات ەتىلەدى. بۇل تۋرالى سامارقاندا ءوتىپ جاتقان ۇنەمى قونىس اۋدارىپ تىرشىلىك ەتەتىن جابايى جانۋار تۇرلەرىن ساقتاۋ كونۆەنسياسىنىڭ كەزەكتى وتىرىسىندا (COP 14) ق ر ەكولوگيا جانە تابيعي رەسۋرستار ۆيتسە-ءمينيسترى نۇركەن شاربيەۆ ءمالىم ەتتى، دەپ حابارلايدى Kazinform.

اگەنتتىگىنىڭ وزبەكستانداعى مەنشىكتى ءتىلشىسى.

«ناقتى ەسەپ جوق. تەك تابىلعان، الىنعان مۇيىزدەردىڭ سانى بار. وسى جىلى 4 مىڭداي كيىك ءمۇيىزى الىندى. ەندى ونى ەكىگە بولسەڭىزدەر (شامامەن 2 مىڭ باس كيىك - اۆت.)، براكونەرلەر اتقان اقبوكەن سانى شىعادى. بۇل تەك قۇزىرلى ورگاندار تاپقان، ۇستاعان فاكتىلەر نەگىزىندە انىقتالعان مولشەر»، - دەدى نۇركەن شاربيەۆ Kazinform ءتىلشىسىنىڭ ساۋالىنا جاۋاپ بەرە وتىرىپ.

ايتا كەتەيىك، 10-اقپاننان باستاپ قازاقستاندا كيىك اتۋعا تىيىم سالىندى. الايدا، ەكولوگيا جانە تابيعي رەسۋرستار ۆيتسە-ءمينيسترى بيىل قىركۇيەك پەن قاراشا ارالىعىندا اقبوكەندى اۋلاۋعا قايتا رۇقسات بەرىلەتىنىن ءمالىم ەتتى.

Фото: Әлихан Асқар

«بىلتىردان باستاپ رۇقسات بەرىلگەن ارالىقتا 41 مىڭ باس اۋلاندى. جانۋاردىڭ سانىن رەتتەۋ جونىندەگى بيولوگيالىق نەگىزدەمەگە ساي، 336 مىڭ باس جوسپارلانعان ەدى. دەگەنمەن اۋا رايى مەن ەت وڭدەۋ كاسىپورىندارىنىڭ شەكتەۋلى قۋاتىنا بايلانىستى شامامەن 2 ايدىڭ ىشىندە 41 مىڭ كيىك اۋلاندى. بيىل دا بۇل جۇمىس جالعاسادى. ياعني، 1-قىركۇيەك پەن 30-قاراشا ارالىعىندا اقبوكەندى اۋلاۋعا رۇقسات ەتىلەدى. ونىڭ كولەمى بيولوگيالىق نەگىزدەمەگە ساي انىقتالادى. ەگەر كيىك سانىن رەتتەپ وتىرماساق، اۋىل شارۋاشىلىعى جەرلەرىنە، تيىسىنشە فەرمەرلەرگە شىعىن كەلەدى»، - دەپ ءتۇسىندىردى نۇركەن شاربيەۆ.

Фото: Әлихан Асқар

توقتالا كەتسەك، سامارقاندا ءوتىپ جاتقان كونفەرەنسيا بارىسىندا كيىكتەردىڭ ميگراتسياسى ماسەلەسى دە تالقىلاندى. بۇگىندە قازاقستاننىڭ وزبەكستان جانە تۇرىكمەنستانمەن اراداعى شەكاراسىندا 600 گەكتار اۋماق قاراستىرىلعان. ول جەردەگى قورشاۋلار الىنعان، تيىسىنشە ەلىمىزدى مەكەندەيتىن اقبوكەندەر كۇزدەن باستاپ اتالعان مەملەكەتتەرگە كوشەدى.

وزبەكستاندىق ساراپشىلاردىڭ ايتۋىنشا، سوڭعى كەزدەرى كيىك ميگراتسياسى كۇرت ازايعان. ويتكەنى، جانۋارلاردىڭ ۇنەمى قونىس اۋداراتىن اۋماقتارىندا تەمىرجول سالىنىپتى.

اۆتور

ءاليحان اسقار