بيىل جالپى قۇنى 1,3 تريلليون تەڭگە بولاتىن 180 جوبا ىسكە قوسىلادى

استانا. KAZINFORM - بيىلعى جوبالار پۋلىندا 1,3 تريلليون تەڭگەنى قۇرايتىن 180 جوبا بار. بۇل تۋرالى ۇكىمەت وتىرىسىندا ونەركاسىپ جانە قۇرىلىس ءمينيسترى قانات شارلاپايەۆ ايتتى.

«بيىلعى جوبالار پۋلىندا 1,3 تريلليون تەڭگەنى قۇرايتىن 180 جوبا بار. بۇل جوبالار ىسكە قوسىلعاندا، 15 مىڭنان استام تۇراقتى جۇمىس ورنى اشىلادى. جىل باسىنان بەرى 158 ميلليارد تەڭگەگە 43 جوبا ىسكە قوسىلىپ، ەكى مىڭداي جۇمىس ورنى اشىلدى»، - دەدى مينيستر.

قانات شارلاپايەۆتىڭ دەرەگىنشە، ىسكە قوسىلعان جوبالاردىڭ قاتارىندا ماڭعىستاۋ وبلىسىنداعى كازازوت امموني سۋلفاتى، قىزىلوردا وبلىسىنداعى Orda Glass ەنەرگيا ۇنەمدەيتىن شىنى، باتىس قازاقستان وبلىسىنداعى كاسپي مۇناي كاپيتال مۇناي گاز جابدىقتار وندىرىستەرى بار. بۇل جوبالاردىڭ نەگىزگى ماقساتى - يمپورتتى الماستىرۋ.

«سونىمەن قاتار، جىل سوڭىنا دەيىن شىمكەنت قالاسىندا Wan Sheng Ceramic كەراميكالىق پليتكالار ءوندىرىسى، قوستاناي وبلىسىندا KamLitKZ جۇك اۆتوموبيلدەر كومپونەنتتەرىنىڭ ءوندىرىسى، قوستاناي وبلىسىندا پرۋجينا تەمىرجول ۆاگوندارىنا ارنالعان پرۋجينالار ءوندىرىسىن ىسكە قوسۋ كوزدەلگەن»، - دەدى ول.

اۆتور

مارلان جيەمباي