بيىل ءۇي قاماققا الىنعانداردىڭ 60 پايىزىنا ەلەكتروندى بىلەزىك تاعىلعان

استانا. KAZINFORM - بيىل ءۇي قاماققا الىنعانداردىڭ 60 پايىزىنا ەلەكتروندى بىلەزىك تاعىلعان. بۇل تۋرالى ق ر جوعارعى سوتىنىڭ سۋدياسى ساكەن ابدوللا ايتتى.

«بەلسەندى ىسكە اسىرىلىپ جاتقان جوعارعى سوتتىڭ تاعى ءبىر باستاماسى - ەلەكتروندى بىلەزىكتەر تاعۋ جوباسى. جىل سايىن سوتتار 11 مىڭنان استام ازاماتتى قاماۋعا الۋ تۋرالى سانكسيا شىعارادى. ال ءۇي قاماققا الۋ سياقتى ىزگىلىكتى الدىن الۋ شاراسى 35 ەسە از (ورتا ەسەپپەن جىلىنا 300 ادام) قولدانىلادى. وسى ماسەلەنى زەرتتەي وتىرىپ، ءبىز ەلەكتروندى بىلەزىكتەر جۇيەسىن پايدالانۋ تۋرالى قورىتىندىعا كەلدىك. بيىلدىڭ وزىندە ءۇي قاماققا الىنعانداردىڭ 60 پايىزىنا ەلەكتروندى بىلەزىك تاعىلعان. بۇل جۇمىس جالعاسۋدا»، - دەدى ول ورتالىق ازياداعى قىلمىستىق سوت تورەلىگى بويىنشا ساراپشىلاردىڭ 9-فورۋمىندا.

سۋديانىڭ ايتۋىنشا، ءبىر ادامدى ءبىر اي قاماۋدا ۇستاۋ ءۇشىن بيۋدجەتتەن 750 مىڭ تەڭگە نەمەسە ءبىر جارىم مىڭ ا ق ش دوللارى شىعىندالادى. ال ءبىر بىلەزىكتى جالعا الۋ قۇنى ايىنا 30 ا ق ش دوللارىن (15 مىڭ تەڭگە) قۇرايدى.

ياعني، كۇدىكتىنى ەلەكتروندى بىلەزىك قولدانا وتىرىپ ءۇي قاماققا الۋ مەملەكەت ءۇشىن الدەقايدا ارزانعا تۇسەدى.

ايتا كەتەيىك، بۇعان دەيىن سوتقا دەيىن قاماۋعا الىنعاندارعا دا ەلەكتروندى بىلەزىك تاعىلۋى مۇمكىن ەكەنىن جازعان ەدىك.