بيىل استانادا 30 قوعامدىق ورىن اشىلدى
استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا قالادا اتقارىلعان شارۋالار تۋرالى جازدى، دەپ حابارلايدى ەلوردا اكىمدىگىنىڭ رەسمي سايتى.
«بيىل قالانى كوركەيتۋ بويىنشا اۋقىمدى جۇمىس جۇرگىزىلدى! 140-قا جۋىق اۋلا مەن 30 قوعامدىق كەڭىستىك (ساياباقتار، گۇلزارلار، جەلەكجولدار، اللەيالار) اباتتاندىرىلدى. قالا تۇرعىندارى مەن قوناقتارى بوس ۋاقىتىن پايدالى وتكىزەتىن تارتىمدى ورىندار كوپتەپ اشىلدى.
ماسەلەن، تۇرعىندار ماڭگىلىك ەل داڭعىلى، ءاليحان بوكەيحان جانە ورىنبور كوشەلەرىنىڭ كۆادراتىندا ورنالاسقان ۋچاسكەنى اباتتاندىرۋ ماسەلەسىن كوتەردى. ءبىز بۇل جەردەگى ساياباقتى اباتتاندىردىق. ول بىرنەشە فۋنكتسيونالدى ايماققا بولىنگەن، ولاردىڭ ءارقايسىسى ءتۇرلى توپتاعى كەلۋشىلەرگە ارنالعان. بۇل ماڭايدا سەرۋەندەۋ الاڭى، دەمالىستى جايلىلىقتا وتكىزۋگە ارنالعان ايماق - مۇندا مادەني ءىس-شارالارعا ارنالعان شاعىن امفيتەاتر، كوگالداندىرىلعان ايماق، بالالارعا ارنالعان ويىن الاڭى - ءتۇرلى كەشەندەرى بار ويىن الاڭدارى، اتكەنشەكتەر مەن قۇمسالعىشتار بولادى. قازىرگى ۋاقىتتا سوڭعى جۇمىستارى ءجۇرىپ جاتىر.
سونىمەن قاتار، «جاستار» ساياباعى ايتارلىقتاي وزگەردى. مۇندا سكەيت-پارك، پامپ-ترەك، ويىن ايماعى جانە ت. ب. ورناتىلدى. ساياباق اۋماعىندا قازىرگى زامانعى
«سانا» سپورت كەشەنى دە جۇمىس ىستەيدى.
بيىل قالانىڭ ۆوكزال ماڭى مەن وعان ىرگەلەس جاتقان ءبىرجان سال جانە گەتە كوشەلەرى اباتتاندىرىلدى. ۆوكزال ماڭىنداعى كوشەلەردىڭ جالپى ۇزىندىعى - 1,5 ك م. سول سياقتى مۇندا 5 قوعامدىق كەڭىستىكتى اباتتاندىرۋ قاراستىرىلدى.
تاۋەلسىزدىك سارايىنىڭ الدىندا ورنالاسقان «قازاق ەلى» الاڭىندا جالپى اۋدانى 13 گەكتار اۋماقتى اباتتاندىرىپ، كوگالداندىرۋ بويىنشا اۋقىمدى جۇمىس جۇرگىزدىك.
بۇل جۇمىسپەن قالانىڭ بارلىق اۋدانىن قامتىدىق. كەلەسى جىلى دا اۋلالار مەن قوعامدىق كەڭىستىكتەردى (گۇلزارلار، جەلەكجولدار، ساياباقتار) اباتتاندىرۋ بويىنشا اۋقىمدى جۇمىس جۇرگىزۋدى جوسپارلاپ وتىرمىز»، - دەپ جازدى ەلوردا اكىمى.