بيىل الماتىدا قانشا ەسكى ءۇي سۇرىلەدى
الماتى. KAZINFORM - مەگاپوليستە نەگىزىنەن 50 جىل بۇرىن سالىنعان ەسكى عيماراتتار ىرىكتەپ الىنعان. بۇل تۋرالى الماتى قالاسى اكىمدىگىنە قاراستى كۇردەلى قۇرىلىس كاسىپورنىنىڭ Kazinform ساۋالىنا جولداعان جاۋابىندا ايتىلعان.
بىلتىر ءماسليحات شەشىمىمەن الماتى قالاسىنىڭ 2030 -جىلعا دەيىنگى جاڭا تۇرعىن ءۇيدى رەنوۆاتسيالاۋ باعدارلاماسى بەكىتىلگەن.
- اتالعان باعدارلاماعا 1930 -جىلدان 1980 -جىلعا دەيىنگى كەزەڭدە سالىنعان، ەكى قاباتقا دەيىنگى توزىعى جەتكەن نەمەسە اپاتتى كوپ پاتەرلى تۇرعىن ۇيلەر، جەكە تۇرعىن ۇيلەر، ونەركاسىپتىك، كوممەرتسيالىق، قوعامدىق جانە باسقا دا كەشەندى قۇرىلىس پەن ينفراقۇرىلىمدى وزگەرتۋ قاجەت ەتەتىن وبەكتىلەر ەنگىزىلدى. رەنوۆاتسياعا كىرەتىن نىسانداردىڭ تىزبەسىن الماتى قالاسىنىڭ اتقارۋشى ورگانى سەيسموتۇراقتىلىق بويىنشا عىلىمي-زەرتتەۋ ينستيتۋتتارىنىڭ قورىتىندىلارى نەگىزىندە انىقتاپ، ونى الماتى قالاسى ءماسليحاتىنىڭ قۇرىلىس، ساۋلەت، ۋربانيستيكا، جەر قاتىناستارى جانە قوعامدىق كەڭىستىكتەردى دامىتۋ جونىندەگى تۇراقتى كوميسسياسىمەن كەلىسۋ ارقىلى جەرگىلىكتى اتقارۋشى ورگاننىڭ قاۋلىسىمەن بەكىتەدى، - دەلىنگەن جاۋاپتا.
سونداي-اق باعدارلاماعا ەنگىزىلگەن كوپپاتەرلى ۇيلەر مەن باسقا دا رەنوۆاتسيالاۋ نىساندارىنىڭ ءسۇرىلۋ كەزەكتىلىگى ولاردىڭ تەحنيكالىق جاي-كۇيىن ەسكەرە وتىرىپ، رەنوۆاتسيا وفيسىمەن بەلگىلەنەدى.
جاڭا باعدارلاما بويىنشا ەسكى ءۇي بۇزىلعاندا مەنشىك يەسىندە پاتەرىن جاڭا پاتەرگە اۋىستىرۋ نەمەسە نارىقتاعى باعاسىنا قاراي اقشالاي وتەماقى الۋ مۇمكىندىگى بەرىلەدى.
پاتەر ايىرباستاۋ بۇرىنعىداي «بولمەنى بولمەگە» قاعيداسى بويىنشا جۇزەگە اسادى. مىسالى، تۇرعىن سانىنا قاراماستان 1 بولمەلى پاتەر ءۇشىن تەك 1 بولمەلى پاتەر الۋعا بولادى. بۇرىن ايىرباستاۋ مۇمكىندىگى عانا بولعان ەدى.
رەنوۆاتسيا باعدارلاماسىن قارجىلاندىرۋ اكىمدىككە، ناقتى ايتقاندا كۇردەلى قۇرىلىس كاسىپورنىنا اۋىسادى (ك ق ك). جاڭا تۇرعىن ءۇي سالۋ جانە قونىس اۋدارۋ قورىنا پاتەر ساتىپ الۋ ءۇشىن قاراجات رەسپۋبليكالىق جانە جەرگىلىكتى بيۋدجەتتەن بولىنەدى.
جەكە ينۆەستورلار تەك باعدارلاما اكىمشىسى - «الماتى» الەۋمەتتىك-كاسىپكەرلىك كورپوراتسياسى ارقىلى قاتىسادى.
ك ق ك ينۆەستورلارعا ەسكى ءۇيدى ساتىپ الۋ، جاڭا ۇيلەر مەن سىرتقى ينجەنەرلىك جەلىلەردى سالۋ ءۇشىن نەسيە بەرەدى.
جاڭا باعدارلامادا بارلىق ەسكى ءۇي مىنانداي كاتەگوريالارعا بولىنگەن:
- ينۆەستيتسيا جاساۋعا بولمايتىن وبەكتىلەر؛ ياعني، اپاتتى جاعدايداعى جانە سەيسمولوگيالىق جارىقتا، قىزىل سىزىقتا ورنالاسقان، جەر تەلىمىنىڭ از بولىگىن الىپ جاتقان ۇيلەر جاتادى. جەكە قۇرىلىس سالۋشىلار مۇنداي جەرلەرگە قىزىقپايدى، ويتكەنى ول جەرگە جاڭا تۇرعىن ءۇي كەشەنىن سالۋ مۇمكىن ەمەس.
- ينۆەستيتسيا جاساۋعا بولاتىن وبەكتىلەر؛ جەكە قۇرىلىس سالۋشىلار تەك وسى سانات بويىنشا تۇرعىن ءۇي سالا الادى. ءبىراق جوبادا قابات پەن حالىق سانى سياقتى تالاپتار ەسكەرىلىپ، قالانىڭ جاڭا باس جوسپارىنا ساي بولۋى كەرەك.
Kazinform وڭتۇستىك استانادا قانشا ەسكى ءۇي بار جانە باعدارلاماعا سايكەس نەشە باسپانا بۇزىلاتىنى جونىندە سۇرادى.
- قازىر الماتى قالاسىندا 43 مىڭنان استام ادام تۇراتىن 1366 توزىعى جەتكەن ءۇي بار، 2025 -جىلى باعدارلاماعا سايكەس 78 ەسكى ءۇي بۇزىلادى. باعدارلاما اياسىندا 2030 -جىلعا دەيىن 676 ەسكى كوپپاتەرلى تۇرعىن ۇيگە رەنوۆاتسيا جۇرگىزۋ جوسپارلانىپ وتىر، - دەپ جازىلعان كومپانيا جاۋابىندا.
ەسكە سالايىق، الماتىداعى ەسكى ۇيلەردىڭ @- دان استامى تۇركسىب اۋدانىندا ورنالاسقان.
وسىعان دەيىن الماتىنىڭ بۇرىنعى اكىمى بۇزىلاتىن ەسكى ۇيلەر ءۇش ساناتقا بولىنەتىنىن ايتقان بولاتىن.
اۆتور
الما مۇقانوۆا