قىتايدا سوڭعى ەكى جىلدا 20 مىڭنان استام بالاباقشا جابىلدى

استانا. KAZINFORM - قىتايدا بالاباقشالار سانى جانە مەكتەپكە دەيىنگى ءبىلىم الۋشىلار سانى ايتارلىقتاي قىسقاردى. بۇل تۋرالى Tencent News اگەنتتىگى جازدى.

قىتاي ءبىلىم مينيسترلىگى 10-قازان كۇنى جاريالاعان «2023 -جىلعى ۇلتتىق ءبىلىم بەرۋ دامۋى تۋرالى ستاتيستيكالىق ەسەپكە» سايكەس، 2023 -جىلى ەلدە 274400 بالاباقشا تىركەلگەن، بۇل الدىڭعى جىلمەن سالىستىرعاندا 14808 گە ازايىپ، %5,12 دىق تومەندەۋدى كورسەتەدى. سونداي- اق، مەكتەپكە دەيىنگى ءبىلىم الۋشىلار سانى 40,93 ميلليونعا جەتىپ، وتكەن جىلمەن سالىستىرعاندا 5,35 ميلليون بالاعا نەمەسە ,55 عا قىسقارعان.

Tencent News اگەنتتىگىنىڭ حابارلاۋىنشا، قىتايدا بالاباقشالار سانى مەن مەكتەپكە دەيىنگى ءبىلىم الۋشىلار سانىنىڭ ازايۋى 2023 -جىلى عانا ەمەس، ودان ەرتەرەك باستالعانى كورىنەدى.

«2022 -جىلعى ۇلتتىق ءبىلىم بەرۋ دامۋى تۋرالى ستاتيستيكالىق ەسەپ» دەرەكتەرىنە سايكەس، 2022 -جىلى قىتايدا جالپى 289200 بالاباقشا بولعان، بۇل الدىڭعى جىلمەن سالىستىرعاندا 5610 بالاباقشاعا از، ياعني %1,90 عا تومەندەگەن. مەكتەپكە دەيىنگى ءبىلىم الۋشىلار سانى 46,28 ميلليوندى قۇراپ، وتكەن جىلمەن سالىستىرعاندا 1,78 ميلليون بالاعا، ياعني %3,70 عا قىسقارعان.

بۇدان بۇرىن Lianhe Zaobao سايتىنىڭ حابارلاۋىنشا، سوڭعى جىلدارى قىتايداعى تۋۋ دەڭگەيىنىڭ تومەندەۋى بالاباقشاعا باراتىن بالالار سانىنىڭ كۇرت ازايۋىنا سەبەپ بولعان.

تاريحي مالىمەتتەرگە سۇيەنسەك، «ەكى بالا» ساياساتى ەنگىزىلگەننەن كەيىن 2016 جانە 2017 -جىلدارى تۋۋ كورسەتكىشى 17 ميلليوننان استى، اسىرەسە 2016 -جىلى بۇل كورسەتكىش 18,83 ميلليونعا جەتتى. الايدا، 2018 -جىلى بۇل كورسەتكىش تومەندەي باستادى: سول جىلى 15,23 ميلليون بالا دۇنيەگە كەلسە، 2019 -جىلى 14,65 ميلليون، 2020 -جىلى 12 ميلليون بالا تۋىلدى.

سونىمەن قاتار، 2021 -جىلى قىتايدا 10,62 ميلليون بالا دۇنيەگە كەلسە، 2022 -جىلى بۇل كورسەتكىش 9,56 ميلليوندى، 2023 -جىلى 9,02 ميلليوندى قۇراعان. بولاشاقتا بالاباقشالارعا قابىلداۋ كورسەتكىشتەرى تومەندەي بەرەدى دەپ بولجانىپ وتىر.

تۋۋ كورسەتكىشىنىڭ تومەندەۋى ءوز كەزەگىندە قىتايداعى ءبىرقاتار اۋرۋحانالاردىڭ اكۋشەرلىك قىزمەتىنە دە اسەر ەتتى.

Reuters اگەنتتىگىنىڭ دەرەگىنشە، سوڭعى ەكى ايدا جىجياڭ جانە جياڭشي پروۆينتسيالارىنداعى بىرنەشە اۋرۋحانالار اكۋشەرلىك بولىمدەردى جابىلعانىن مالىمدەگەن.

اۆتور

دانا نۇرباقىت