بىرىككەن ۇلتتار ۇيىمىنىڭ قاۋىپسىزدىك كەڭەسى گازادا اتىستى توقتاتۋ تۋرالى قارار قابىلدادى
استانا. KAZINFORM - بىرىككەن ۇلتتار ۇيىمىنىڭ قاۋىپسىزدىك كەڭەسى العاش رەت گازا سەكتورىندا اتىستى توقتاتۋدى جانە كەپىلگە الىنعان ادامداردى دەرەۋ بوساتۋدى تالاپ ەتەتىن قارار قابىلدادى. قۇجاتتى 14 مەملەكەت قولدادى، ا ق ش قالىس قالدى.
BBC News-تىڭ حابارلاۋىنشا، 25-ناۋرىزدا ب ۇ ۇ قاۋىپسىزدىك كەڭەسى گازا سەكتورىندا «تەز ارادا اتىستى توقتاتۋعا» شاقىراتىن قارار قابىلداعان.
سونداي-اق قۇجات بارلىق كەپىلگە الىنعان ادامداردى دەرەۋ بوساتۋدى تالاپ ەتەدى. بۇل - 2023 -جىلدىڭ قازان ايىندا حاماس يزرايل اۋماعىنا شابۋىل جاساعاننان كەيىن يزرايل مەن حاماس اراسىندا سوعىس باستالعاننان بەرى ب ۇ ۇ قاۋىپسىزدىك كەڭەسى ماقۇلداعان مۇنداي العاشقى شاقىرۋ. بۇعان دەيىن قاۋىپسىزدىك كەڭەسىنىڭ گازادا اتىستى توقتاتۋعا شاقىراتىن قارارلارىنا توسقاۋىل قويعان ا ق ش بۇل جولى داۋىس بەرۋدەن قالىس قالدى، دەپ جازدى The Guardian.
قابىلدانعان رەزوليۋتسيانى كەڭەستىڭ تۇراقتى ەمەس 10 مۇشەسى جازىپ، موزامبيك وكىلى ۇسىنعان. قاۋىپسىزدىك كەڭەسىنىڭ 14 مۇشەسى قۇجاتقا داۋىس بەردى.
- قاۋىپسىزدىك كەڭەسى جاقىندا عانا گازا سەكتورى بويىنشا كوپتەن كۇتكەن قاراردى ماقۇلداپ، تەز ارادا اتىستى توقتاتۋدى جانە بارلىق كەپىلگە الىنعانداردى دەرەۋ ءارى ءسوزسىز بوساتۋدى تالاپ ەتتى. بۇل قاۋلى مىندەتتى تۇردە ورىندالۋى كەرەك، - دەپ جازدى ب ۇ ۇ باسشىسى انتونيۋ گۋتەرريش.
اۆتور
جاراسقان نۇرىبايەۆ