بىرلىك كەرۋەنى: الماتى كوشەلەرىندە قازاق باتىرلارى اتپەن ءجۇرىپ ءوتتى
الماتى. KAZINFORM - استانادا وتەتىن V دۇنيەجۇزىلىك كوشپەندىلەر ويىندارىنا الماتىدان «بىرلىك كەرۋەنى» جولعا شىقتى.
سپورت دەلەگاتسياسىنىڭ قۇرامىنا اۋدارىسپاق بويىنشا اعا جاتتىقتىرۋشى اسحات رىسوۆ، قازىرگى قازاق كۇرەسىنىڭ نەگىزىن قالاۋشىلاردىڭ ءبىرى ەلەمەس ءالىمحانوۆ، ق ر قازاق كۇرەسى فەدەراتسياسىنىڭ ءبىرىنشى ءتوراعاسى ەرعالي مۇحيددينوۆ، قۇسبەگىلىك «قىران» فەدەراتسياسىنىڭ پرەزيدەنتى باعدات مۇپتەكە قىزى، توعىزقۇمالاق بويىنشا جاتتىقتىرۋشى ءالىمجان قىدىربايەۆ، قازاق كۇرەسىنەن ق ر ەڭبەك سىڭىرگەن جاتتىقتىرۋشىسى باۋىرجان ءتالىپ، سپورتتىڭ قۇرمەتتى قايراتكەرى، اسىق اتۋدان جاتتىقتىرۋشى ايتالاپ قورعامبايەۆ، الماتى قالاسى بويىنشا ۇلتتىق ويىنداردى ۇيىمداستىرۋ جونىندەگى جاۋاپتى ۇيلەستىرۋشى نۇرلان وسپانوۆ ەنگەن.
قازاقستان استاناسىنا ويىنداردىڭ مادەني باعدارلاماسىنا قاتىساتىن شىعارماشىلىق ۇجىمدار دا اتتاندى، «كوشپەندىلەر الەمى» ەتنواۋىلىن ۇيىمداستىرۋ ءۇشىن كيىز ۇيلەر جىبەرىلدى.
سالتاناتتى شارانىڭ ماڭىزدى ەلەمەنتى دوستىق داڭعىلىنىڭ بويىنداعى اباي اتىنداعى الاڭعا دەيىن بىرلىك كەرۋەنىنىڭ تەاترلاندىرىلعان كورىنىس كورسەتە ءجۇرىپ، ءوتۋى بولدى. اتقا مىنگەن قازاق باتىرلارى الماتى دەلەگاتسياسىنىڭ وكىلدەرى استاناعا اپاراتىن ايۋساي شاتقالىنان كيەلى سۋدى جەتكىزدى.
ەستەرىڭىزگە سالا كەتەيىك، سۋ ءبىرىنشى دۇنيەجۇزىلىك كوشپەندىلەر ويىندارىنىڭ باستى قاسيەتتى سيمۆولى جانە نەگىزگى ەلەمەنتى بولدى. الماتىدا سۋ ايۋساي سارقىراماسىنان الىندى.
بىرلىك كەرۋەنىنە قاتىسۋشىلار اراسىندا Nomad اتتى اكروباتيكالىق توبى، «ارلان جەتە» ۇلتتىق داستۇرلەر تەاترىنىڭ اكتەرلەرى، «الاتاۋ» ءداستۇرلى ونەر تەاترىنىڭ اكتەرلەرى جانە قالانىڭ سەگىز اۋدانىنىڭ وكىلدەرى بار.
ويىنداردىڭ اشىلۋ كۇنى، 8-قىركۇيەكتە، ەلىمىزدىڭ ءار وڭىرىنەن كيەلى سۋمەن تولتىرىلعان تورسىقتارى (شىنايى بىلعارىدان جاسالعان قازاق ۇلتتىق ىدىستارى) بار باتىرلاردان تۇراتىن جارقىن شەرۋ ءراسىم وتەتىن جەرگە بارادى.
بۇعان دەيىن ۇلتتىق جانە ات سپورتى كلۋبىنىڭ جەتەكشىسى نۇرلان وسپانوۆ قۇسبەگىلىك سايىسى دۇنيەجۇزىلىك كوشپەندىلەر ويىنىنا العاش رەت قوسىلاتىنى تۋرالى ايتقان ەدى.
اۆتور
الما مۇقانوۆا