بيرجاداعى التىن باعاسى تاريحي رەكوردتى جاڭارتتى

استانا. KAZINFORM - بيرجاداعى سوڭعى اقپاراتتارعا سۇيەنسەك، نيۋ-يوركتەگى Comex بيرجاسىنداعى ماۋسىمدىق التىن فيۋچەرستەرىنىڭ باعاسى 35,2 دوللارعا نەمەسە 1,46 پايىزعا ءوسىپ، ءار ۋنتسياسى 2452,6 دوللارعا دەيىن جەتتى.

ال شىلدەدەگى كۇمىس فيۋچەرستەرى 3,5 پايىزعا، ءار ۋنتسياسىنا - 32,352 دوللارعا دەيىن ارتىپ وتىر.

ا ق ش- تىڭ فەدەرالدى رەزەرۆ جۇيەسى كۇزدە نەگىزگى مولشەرلەمەنى تومەندەتۋى مۇمكىن دەگەن بولجام بار. سايكەسىنشە، التىننىڭ قۇنى تومەندەمەي، كەرىسىنشە كوتەرىلىپ كەلەدى.

CME Group مالىمەتىنشە، ينۆەستورلاردىڭ شامامەن 65 پايىزى بيىل قىركۇيەك ايىندا ديسكونتتاۋ مولشەرلەمەسىنىڭ تومەندەگەنىن كۇتىپ وتىر.

ءداستۇر بويىنشا ا ق ش- تىڭ فەدەرالدىق رەزەرۆتىك جۇيەسىندەگى اقشا-نەسيە ساياساتىنىڭ السىرەۋى دوللار باعاسىن ۇستاپ، التىننىڭ قۇنىن ساقتايتىنىن اتاپ وتكەن ءجون.

سوندىقتان دا، قالتالىلار ۇيقىسىنان تۇرا سالا بيرجاعا نازار اۋدارادى.

سونداي-اق، ينۆەستورلار وسى سارسەنبىدە فەدرەزەرۆتىڭ مامىر ايىنداعى وتىرىسىنىڭ حاتتاماسى جاريالاناتىنىن كۇتەدى.

قۇجاتتا رەتتەۋشىنىڭ ديسكونتتاۋ مولشەرلەمەسىن تومەندەتۋ مەرزىمدەرى بويىنشا مۇمكىن بولاتىن جوسپارلارى تۋرالى ۇسىنىستار، كەڭەستەر بولۋى مۇمكىن.