بىرەۋدىڭ جۇرەگىمەن 40 جىل ءومىر سۇرگەن ادام گيننەس رەكوردتار كىتابىنا ەندى

استانا. KAZINFORM - گيننەستىڭ رەكوردتار كىتابى نيدەرلاندتىڭ 57 جاستاعى تۇرعىنى بەرت يانسسەننىڭ جۇرەك ترانسپلانتاتسياسىنان كەيىن تاريحتا ۇزاق ءومىر سۇرگەن ادام ەكەنىن راستادى. وعان وسىدان 40 جىلعا جۋىق ۋاقىت بۇرىن وتا جاسالعان، دەپ جازادى BBC.

17 جاسىندا يانسسەنگە كارديوميوپاتيا دياگنوزى قويىلدى. بۇل - جۇرەكتىڭ قان ايداۋ قابىلەتىنە اسەر ەتەتىن اۋرۋ.

دارىگەرلەر ەمدەۋ ءۇشىن جۇرەك ترانسپلانتاتسياسى قاجەت دەپ شەشتى. ول كەزدە ەلدە مۇنداي وتالار جاسالماعان.

سودان كەيىن يانسسەننىڭ دارىگەرى لوندونداعى جۇرەك اۋرۋلارىنا ماماندانعان بريتاندىق حارفيلد اۋرۋحاناسىنا جۇگىندى.

ونى ەمدەۋگە ايگىلى مىسىرلىق- بريتاندىق حيرۋرگ ماگدي ياكۋب كىرىستى. بۇل دارىگەر كەيىن مەديتسيناعا قوسقان ۇلەسى ءۇشىن رىسار اتاعىن الدى.

جۇرەك ترانسپلانتاتسياسى 1984 -جىلى 6-ماۋسىمدا، 18 جاستاعى يانسسەن اۋرۋحاناعا جاتقاننان ءبىر اپتادان كەيىن جاسالدى.

«ءبارى وتە تەز ءوتتى. حارفيلدكە كەلگەنىمە ءبىر اپتا بولعان، لوندونداعى اۋىر جول اپاتىنان كەيىن بىردەن ەكى دونور جۇرەك پايدا بولدى. ونىڭ بىرەۋى ماعان تۋرا كەلىپ، ترانسپلانتاتسيالاندى»، - دەيدى پاتسيەنت.

يانسسەننىڭ ايتۋىنشا، ول ءوزىنىڭ دونورىنان العان «كەرەمەت سىيلىق ءۇشىن ءالى كۇنگە دەيىن ءدان ريزا».

ناۋقاستىڭ ايتۋىنشا، ول وتادان كەيىن تەز ساۋىعىپ، سودان بەرى تولىققاندى ءومىر سۇرگەن. قازىر يانسسەننىڭ ايەلى مەن ەكى بالاسى بار.

جوعارىدا ايتىلعانداي، بەرت يانسسەنگە وتا جاسالعاندا ول 18 جاستا ەدى.

«وسىنداي جولدان وتەمىن دەپ ارمانداعان دا ەمەسپىن. مەنىڭ ويىمشا، ەڭ باستىسى، باسىمنان وتكەن جاعداي باسقا ادامدار ءۇشىن ماڭىزدى ەسكەرتۋ بولدى. ەندى دونورلىق جۇرەكپەن وسى ۋاقىتقا دەيىن ءومىر سۇرۋگە بولاتىنى رەسمي مويىندالدى. باسقا بىرەۋ مەنىڭ رەكوردىمدى جاڭارتسا، ريزا بولار ەدىم»، - دەپ قوستى يانسسەن.

يانسسەن وتاسى حارفيلد اۋرۋحاناسىندا جاسالعان 107- جۇرەك ترانسپلانتاتسياسى بولدى.

ماگدي ياكۋب العاش مۇنداي پروتسەدۋرانى 1980 -جىلى جاساعان.

سودان بەرى جۇرەك ترانسپلانتاتسياسى مىڭداعان پاتسيەنتكە جاسالدى، 2023-2022 -جىلدارى بۇل اۋرۋحانادا جۇرەكتى اۋىستىرۋ بويىنشا 54 وتا وتكىزىلگەن.