بينيامين نەتانياحۋ استان ۋلاندى

استانا. KAZINFORM - يزرايل پرەمەر-ءمينيسترى بينيامين نەتانياحۋ 20-شىلدەدە «قاۋىپتى نەمەسە بۇلىنگەن» تاعامدى تۇتىنعاننان كەيىن گاستروەنتەريتپەن اۋىردى. بۇل تۋرالى يزرايل ۇكىمەتىنىڭ كەڭسەسى حابارلادى.

نەتانياحۋ الداعى ءۇش كۇن ۇيدە دەمالادى، ءبىراق مەملەكەتتىك ىستەردى سول جەردەن جالعاستىرادى.

مالىمدەمەگە سايكەس، 75 جاستاعى نەتانياحۋ تۇندە ءوزىن ناشار سەزىنگەن، وعان دارىگەرلەر ىشەكتىڭ قابىنۋى مەن سۋسىزدانۋ دەگەن دياگنوز قويعان. وعان كوكتامىرىشىلىك سۇيىقتىقتار بەرىلەدى.

- دارىگەرلەردىڭ نۇسقاۋىنا سايكەس، پرەمەر-مينيستر الداعى ءۇش كۇندى ۇيدە دەمالىپ، ۇكىمەت جۇمىسىن ۇيدە جالعاستىرادى، - دەلىنگەن نەتانياحۋ كەڭسەسىنىڭ مالىمدەمەسىندە.

نەتانياحۋ سەنبىگە قاراعان ءتۇنى ءوزىن ناشار سەزىنگەننەن كەيىن يەرۋساليمدەگى حاداسسا ۋنيۆەرسيتەتىنىڭ مەديتسينالىق ورتالىعىنىڭ پروفەسسورى الون حەرشكوعا قارالىپ، سۋسىزدانۋدىڭ الدىن الۋ ءۇشىن تامىر ىشىنە سۇيىقتىق الدى.

Reuters اگەنتتىگىنىڭ حابارلاۋىنشا، نەتانياحۋ 2023 -جىلى كارديوستيمۋلياتور (جۇرەك ءريتمىن ەلەكترلىك رەتتەگىش) ورناتقان. وتكەن جىلدىڭ جەلتوقسان ايىندا نەسەپ شىعارۋ جولدارىنىڭ ينفەكتسياسى دياگنوزى قويىلعان سوڭ، وعان قۋىق استى بەزىن الىپ تاستاۋ وپەراتسياسى جاسالعان.

The Jerusalem Post گازەتىنىڭ جازۋىنشا، پرەمەر- ءمينيستردىڭ «مەملەكەتتىك جۇمىسىن ۇيدەن جۇرگىزۋى» ونىڭ دۇيسەنبى مەن سەيسەنبىگە بەلگىلەنگەن قىلمىستىق ىستەر بويىنشا سوت وتىرىسىنا قاتىسا المايتىنىن بىلدىرەدى. ەندى سوت وتىرىسى قىركۇيەك ايىندا، سوتتار دەمالىستان ورالعاندا عانا جالعاسادى.

جەكسەنبى كۇنى كەشكە بينيامين نەتانياحۋدىڭ ادۆوكاتتارى دا سوتتان ونىڭ وسى اپتاعا جوسپارلانعان كۋالىك سەسسياسىن رەسمي تۇردە توقتاتۋدى سۇرادى. نەتانياحۋدىڭ كومانداسى ونىڭ كۋالىگىن سارسەنبىگە اۋىستىرۋدى ۇسىندى.

ەسكە سالا كەتەيىك، نەتانياحۋدىڭ ايتۋىنشا، يزرايل گازاعا قاتىستى ديپلوماتياعا دايىن، ءبىراق كۇش قولدانۋعا دا ءازىر.

اۆتور

بەگابات ۇزاقوۆ