بۇگىننەن باستاپ قازاقستاندا جەكە كولىك اكەلۋ ەرەجەسى وزگەردى

استانا. قازاقپارات – 20-قازاننان باستاپ قازاقستاندا جەكە ماقساتتا كولىك اكەلۋگە جاڭا شەكتەۋلەر ەنگىزىلدى.

2025-جىلدىڭ 20-قازانىنان باستاپ قازاقستاندا جەكە پايدالانۋ ءۇشىن كولىك قۇرالدارىن اكەلۋگە قاتىستى جاڭا ەرەجەلەر كۇشىنە ەنەدى. وزگەرىستەر 2025-جىلعى 23-مامىرداعى ەۋرازيالىق ەكونوميكالىق كوميسسيا كەڭەسىنىڭ 45-شەشىمىنە سايكەس قابىلدانعان.

بۇعان دەيىن ازاماتتار جەكە قاجەتتىلىگى ءۇشىن ءارتۇرلى كولىك تۇرلەرى مەن تىركەمەلەردى اكەلە الاتىن. ەندى مۇنداي مۇمكىندىك تەك ە ە ك القاسىنىڭ 2017-جىلعى 30-ماۋسىمداعى 74-شەشىمىمەن بەكىتىلگەن تىزىمگە ەنگىزىلگەن كولىكتەرگە عانا بەرىلەدى.

رۇقسات ەتىلگەن كولىك تۇرلەرى:

جەڭىل اۆتوموبيلدەر (مەديتسينالىق ماقساتتاعى ارنايى كولىكتەردەن باسقا)؛

كۆادروتسيكلدەر، قاردا جانە جولسىز جەرلەردە جۇرەتىن موتوۆەزدەحودتار؛

موتوتسيكلدەر، موتوروللەرلەر، موپەدتەر؛

سىيىمدىلىعى 12 ورىنعا دەيىنگى اۆتوبۋستار مەن تولىق سالماعى 5 تونناعا دەيىنگى جۇك كولىكتەرى.

قۇجاتتىق تالاپتار كۇشەيەدى

قازاقستانعا اكەلىنەتىن بارلىق كولىكتەر «دوڭگەلەكتى كولىك قۇرالدارىنىڭ قاۋىپسىزدىگى تۋرالى» تەحنيكالىق رەگلامەنتكە ساي بولۋى ءتيىس.

نەگىزگى راستاۋشى قۇجات - كولىك قۇرالىنىڭ قۇرىلىمىنىڭ قاۋىپسىزدىگى تۋرالى كۋالىك.

بۇل قۇجات بولماسا، جەكە تۇلعا:

كولىكتى كەدەندىك راسىمدەۋدەن وتكىزە المايدى؛

ەلەكتروندى كولىك پاسپورتى الا المايدى؛

ۋتيليزاتسيالىق الىم تولەي المايدى؛

كولىكتى تىركەۋگە قويا المايدى.

تىيىم سالىنعان كولىكتەر

ە ە ك تىزىمىنە كىرمەگەن اۆتوبۋستار مەن جۇك كولىكتەرىن جەكە تۇلعالار اكەلە المايدى. ياعني، جولاۋشى سىيىمدىلىعى 12 ادامنان اساتىن اۆتوبۋستار جانە تولىق سالماعى 5 توننادان ارتىق جۇك كولىكتەرى تەك زاڭدى تۇلعالار ارقىلى عانا اكەلىنەدى.

مامانداردىڭ ايتۋىنشا، بۇل شەكتەۋلەردىڭ باستى ماقساتى - ەۋرازيالىق ەكونوميكالىق وداق ەلدەرى اراسىنداعى تەحنيكالىق تالاپتاردى بىرىزدەندىرۋ جانە سەرتيفيكاتتالماعان كولىكتەردىڭ ەلگە ەنۋىن بولدىرماۋ.

20-قازاننان باستاپ جەكە تۇلعالار ەلگە كولىك اكەلۋ كەزىندە تەك جوعارىدا كورسەتىلگەن ساناتتاعى كولىكتەردى عانا تىركەي الادى.

ال قالعان تۇرلەرىن راسىمدەۋ، كەدەننەن وتكىزۋ جانە ەسەپكە قويۋ زاڭ جۇزىندە مۇمكىن بولمايدى.