بۇگىننەن باستاپ قازاقستان مەن قىتاي اراسىنداعى ۆيزاسىز رەجيم تۋرالى كەلىسىم كۇشىنە ەندى

بۇگىن، 10-قاراشادا قازاقستان مەن قىتاي حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم كۇشىنە ەندى، دەپ حابارلايدى Kazinform.

بۇل تۋرالى ق ر سىرتقى ىستەر مينيسترلىگى حابارلادى. 

سىرتقى ىستەر مينيسترلىگى باسپا ءسوز قىزمەتىنىڭ مالىمەتىنشە، وسى كەلىسىمنىڭ 1-بابىنا سايكەس ەكى ەلدىڭ ازاماتتارى جەكە ىستەردى، تۋريزمدى، ەم قابىلداۋدى، حالىقارالىق تاسىمالداردى، ترانزيتتىك، سونداي-اق ىسكەرلىك ماقساتتاردى جۇزەگە اسىرۋ ءۇشىن ۆيزالىق تالاپتاردان بوساتىلادى. وسى رەتتە ازاماتتاردىڭ ەكى مەملەكەت اۋماعىندا بولۋ مەرزىمى كۇنتىزبەلىك 30 (وتىز) كۇننەن اسپايتىن مەرزىمدەگى كەزەڭگە، ال كۇنتىزبەلىك 180 (ءجۇز سەكسەن) كۇن ىشىندە جيىنتىعىندا كۇنتىزبەلىك 90 (توقسان) كۇننەن اسپاۋى قاجەت.

ازاماتتاردا 30 كۇننەن ارتىق بولۋ قاجەتتىلىگى بولعان جاعدايدا، ءتيىستى ساناتتاعى كىرۋ ۆيزاسىن الدىن الا راسىمدەۋ قاجەت. ۆيزاسىز رەجيم جۇمىسقا ورنالاسۋعا، وقۋعا جانە ميسسيونەرلىك قىزمەت جاساۋعا قۇقىق بەرمەيدى. جوعارىدا اتالعان كەلىسىم ق ح ر گونكونگ جانە ماكاو ارنايى اكىمشىلىك اۋداندارىنىڭ اۋماعىنا بارۋعا قولدانىلمايتىنىن اتاپ ءوتۋ كەرەك. قازاقستان ازاماتتارى گونكونگقا ۆيزاسىز 14 (ون ءتورت) كۇننەن اسپايتىن مەرزىمگە بارا الادى، ال ماكاوعا بارۋ ءۇشىن ۆيزا راسىمدەۋ قاجەت.

قازاقستاندىقتار 34 ەلگە ۆيزاسىز بارا الادى.