بۇگىننەن باستاپ نۇرسۇلتان نازاربايەۆ اۋەجايىندا اۆتوتۇراق باعاسى قىمباتتادى

جولاۋشىلاردىڭ كولىكتەرىن 7 تاۋلىكتەن 40 تاۋلىككە دەيىن اۋەجاي تۇراعىنا قالدىرىپ كەتۋى سالدارىنان باسقالار بوس ورىن تابا الماي جاتادى.

بۇگىننەن باستاپ استاناداعى حالىقارالىق اۋەجايدىڭ ايماعىندا كولىكتەر ءۇشىن تۇراقتىڭ باعاسى كوتەرىلدى.

اۋەجاي كەشەنى الدىنداعى تۇراقتىڭ P4-P6-ايماعىنا كولىك قالدىرۋ قۇنى ەكىنشى جانە ءۇشىنشى تاۋلىكتە 2 مىڭ تەڭگە، 3 تاۋلىكتەن ارتىق بولعان جاعدايدا تاۋلىگىنە 3 مىڭ تەڭگە بولادى. ال P1-P3-ايماعىندا ءبىرىنشى جانە ەكىنشى كۇنى 3 مىڭ تەڭگە، ال ءۇشىنشى تاۋلىكتەن باستاپ 4 مىڭ تەڭگە بولماق.

سونداي-اق جابىق تۇراققا كولىك قالدىرساڭىز، كەيىنگى تاۋلىكتە كوكتەم-جاز مەزگىلىندە تاۋلىگىنە 3 مىڭ تەڭگەگە، كۇز-قىس مەزگىلىندە 4 مىڭ تەڭگەگە دەيىن وسەدى، - دەيدى اۋەجاي ماماندارى.

قازىر جولاۋشىلار ءوز كولىكتەرىن 7 تاۋلىكتەن 40 تاۋلىككە دەيىن اۋەجاي تۇراعىنا قالدىرىپ كەتەدى. سونىڭ سالدارىنان باسقا ادامدار تۇراقتان بوس ورىن تابا الماي جاتادى. وعان قوسا، قىستا قار تازالاۋ جۇمىستارىنا دا كەدەرگى كەلتىرەدى.

اۋەجايدىڭ تۇراعى كولىكتى قىسقا مەرزىمگە قالدىرۋعا ارنالعان. ال ۇزاق مەرزىمگە قالدىرۋشىلار تەگىن تۇراقتى پايدالانا الادى.