بۇگىننەن باستاپ «ۇلتتىق قور - بالالارعا» جوباسى رەسمي ىسكە قوسىلدى

2024-جىلدىڭ 1- قاڭتارىنان باستاپ «ۇلتتىق قور - بالالارعا» جوباسى رەسمي قولدانىسقا ەندى. الدىن الا مالىمەت بويىنشا، جوبا العاشقى جىلدىڭ وزىندە 7 ميلليوننان استام بالانى قامتيدى، دەپ حابارلايدى Kazinform.

ۇلتتىق قوردى باسقارۋ ۇلتتىق بانكتىڭ قۇزىرىنداعى شارۋا بولعانمەن، «ۇلتتىق قور - بالالارعا» جوباسىنىڭ ۇيلەستىرۋشىسى - قارجى مينيسترلىگى.

ال وپەراتور - ءبىرىڭعاي جيناقتاۋشى زەينەتاقى قورى.

ادىلەت مينيسترلىگىنىڭ بازاسىنداعى دەرەك نەگىزىندە 2024-جىلدىڭ 1- قاڭتارىنداعى جاعداي بويىنشا 18 گە تولماعان بالالاردىڭ ءتىزىمى جاسالادى.

سول ءتىزىم نەگىزىندە ۇلتتىق قوردىڭ ينۆەستيتسيالىق تابىسىنىڭ تەڭ جارتىسىن نەشە بالاعا تەڭدەي ءبولۋ كەرەكتىگى بەلگىلى بولادى.

2024-جىلدىڭ 1- اقپانىندا وسى ەسەپ نەگىزىندە 18 گە تولماعان بالالاردىڭ بارىنە بىردەي مولشەردە اقشا اۋدارىلا باستايدى.

18 جاسقا تولعان سوڭ بالا ۇلتتىق قوردان تۇسكەن تولەمدى تۇرعىن ءۇي ساتىپ الۋعا، ءبىلىم الۋعا، ونىڭ ىشىندە شەتەلدە ءبىلىم الۋ مۇمكىندىگىنە جۇمساي الادى.

ءبىراق باسپانانى تەك قازاقستان اۋماعىنان ساتىپ الۋى كەرەك.

ۇلتتىق قور تولەمىن اۋدارۋ بالا قايتىس بولعان جاعدايدا توقتاتىلادى. بۇل جاعدايدا مۇراگەرلىك قۇقىعى كۇشىنە ەنەدى.

ونداي بالانىڭ مۇراگەرى كىم بولا الاتىنى ازاماتتىق كودەكستىڭ ايرىقشا بولىگىندە كورسەتىلگەن، ياعني ءار بالانىڭ مۇراگەرى ناقتى جاعدايى بويىنشا انىقتالادى.

ال زاڭدى مۇراگەر بالادان قالعان اقشانى ءوز قالاۋىنشا پايدالانادى.

بالا قازاقستان ازاماتتىعىنان ايىرىلعان كەزدە ۇلتتىق قوردان تولەم اۋدارىلمايدى.

ەگەر بالاڭىزدىڭ دەرەكتەرى eGov-تا جوق بولسا، پلاتفورمادا «بالانى قوسۋ» دەگەن باتىرما بار.

سونى باسىپ، بالانىڭ جسن ءنومىرىن ەنگىزۋ ارقىلى تىركەۋگە بولادى.

ال تىركەۋ كەزىندە اقپاراتتار شىقپاي جاتسا، «تۇزەتۋ» باتىرماسىنا ءوتىپ، ءوز قۇجاتىڭىزدى، بالالارىڭىزدىڭ تۋۋ تۋرالى كۋالىگىن ەنگىزەسىز.

ۇلتتىق قوردان بالالارعا بولىنەتىن جيناق سالىقتان بوساتىلادى.

اتا-انالار ەشقانداي قۇجات جينامايدى، ويتكەنى پروتسەسس تۇتاس اۆتوماتتاندىرىلعان.

ءبىرىڭعاي جيناقتاۋشى زەينەتاقى قورى ادىلەت مينيسترلىگىمەن بىرلەسىپ، ءتيىستى ينتەگراتسيالىق جۇمىس جۇرگىزىپ وتىرادى.

بالا 18 جاسقا تولعاننان كەيىن شوتتاعى قاراجاتى 10 جىل ساقتالادى. وسى 10 جىل ىشىندە شوتتاعى قاراجات تالاپ ەتىلمەگەن جاعدايدا سول ادامنىڭ زەينەتاقى شوتىنا اۋدارىلادى.

بالا شوتىنداعى اقشا دوللارمەن ساقتالىپ، 18 گە تولعاننان كەيىنگى 10 جىل ىشىندە تالاپ ەتكەن ۋاقىتتاعى باعام بويىنشا تەڭگەمەن اۋدارىلادى.

اقشا اۋدارۋ جولىمەن عانا پايدالانىلادى، قولما-قول بەرىلمەيدى.