بۇگىن - وتان قورعاۋشى كۇنى
استانا. KAZINFORM - بۇگىن قازاقستاندىقتار وتان قورعاۋشى كۇنىن اتاپ وتەدى.
1992 -جىلى 7-مامىردا قازاقستان رەسپۋبليكاسى پرەزيدەنتىنىڭ قارۋلى كۇشتەردى قۇرۋ تۋرالى 745-جارلىعى جاريالاندى. جارلىقتا وتاندىق قارۋلى كۇشتى قالىپتاستىرىپ، ول ءۇشىن ءتيىستى جاعداي جاساۋ كەرەكتىگى ايتىلعان. بۇل - ەل تىنىشتىعىن قورعاپ، بەيبىتشىلىكتى قامتاماسىز ەتەتىن اسكەري قىزمەتشىلەردى قۇتتىقتاپ، قۇرمەت كورسەتەتىن كۇن.
ايتا كەتەيىك، قازاقستان قارۋلى كۇشتەر قاتارىندا ەر ازاماتتارمەن قاتار، نازىك جاندار دا تەڭدەي قىزمەت اتقارىپ كەلەدى. ولاردىڭ كوپشىلىگى وفيتسەر اتاعىنا يە. سوندىقتان، وتان قورعاۋشى كۇنى - قىز-كەلىنشەكتەردىڭ دە مەرەكەسى.
قازاقستان اسكەرى قۇرىلىمىندا قۇرلىق اسكەرلەرى، اۋە قورعانىسى اسكەرلەرى جانە اسكەري-تەڭىز كۇشتەرى قامتىلعان. سونىمەن قاتار، قازاقستان رەسپۋبليكاسىنىڭ جوعارعى باس قولباسشىسى، پرەزيدەنتتىڭ تىكەلەي باعىنىسىندا ارنايى دايىندالعان اەروۇتقىر اسكەرلەرى بار. ولاردىڭ ماقساتى - توتەنشە جاعدايدا ەرەكشە قۇپيا وپەراتسيالاردى جۇرگىزۋ.
2012 -جىلى 7-مامىر مەملەكەتتىك مەرەكە بولىپ جاريالاندى جانە دەمالىس كۇنى سانالادى.
اتاۋلى كۇن قارساڭىندا ەڭبەگى سىڭگەن سالا ماماندارىنا اسكەري اتاقتار بەرۋ جانە ەرەكشە كوزگە تۇسكەن اسكەري قىزمەتشىلەرگە ناگرادالار تاپسىرۋ داستۇرگە اينالعانىن اتاپ ءوتۋ قاجەت.
وسى ورايدا 5-مامىر كۇنى پرەزيدەنت قاسىم-جومارت توقايەۆ مەملەكەتتىك ناگرادالار، جوعارى اسكەري جانە ارناۋلى اتاقتار، سىنىپتىق شەندەر تاپسىرۋ راسىمىنە قاتىستى.
مەملەكەت باسشىسى - قازاقستان قارۋلى كۇشتەرىنىڭ جوعارعى باس قولباسشىسى سالتاناتتى جيىندا ساردارلار مەن ساربازداردى الداعى وتان قورعاۋشى كۇنىمەن قۇتتىقتادى. سونىمەن قاتار پاتريوتيزم مەن جاۋىنگەرلىك رۋحتىڭ سيمۆولىنا اينالعان مەرەكە كۇندەرى ەلگە قورعان بولىپ جۇرگەن ازاماتتارعا قۇرمەت كورسەتۋ، وتان ءۇشىن وت كەشكەن اعا بۋىننىڭ رۋحىنا تاعزىم ەتۋ، ولاردىڭ جانقيارلىعى مەن وشپەس ەرلىگىن ۇرپاقتىڭ جادىندا جاڭعىرتۋ داستۇرگە اينالعانىن اتاپ ءوتتى.
پرەزيدەنتتىڭ ايتۋىنشا، مەملەكەت قارۋلى كۇشتەردىڭ الەۋەتىن نىعايتۋعا ايرىقشا ءمان بەرىپ وتىر.
ايتا كەتەيىك، بۇگىن ەكىنشى دۇنيەجۇزىلىك سوعىستاعى جەڭىستىڭ 80 جىلدىعىنا ارنالعان ەلوردادا وتەتىن اسكەري شەرۋ بارلىق رەسپۋبليكالىق تەلەارنادان تىكەلەي ەفيردە كورسەتىلەدى.
سالتاناتتى ءىس-شاراعا 4000 نان استام اسكەري قىزمەتشى، 200 دەن استام اسكەري تەحنيكا، سونداي-اق مايداندىق، ارميالىق جانە اسكەري-كولىكتىك اۆياتسيانىڭ 66 ۇشاعى مەن تىكۇشاعى قاتىسادى.