بۇگىن ورازا ايت باستالدى: نە ىستەۋگە بولادى، نە ىستەۋگە بولمايدى؟

بۇگىن، 30-ناۋرىز - قاسيەتتى رامازان ايىنىڭ اياقتالىپ، ورازا ايتتىڭ باستالعان كۇنى. بۇل كۇن - مۇسىلماندار ءۇشىن ۇلكەن مەيرام، جاقسىلىق پەن مەيىرىمگە تولى ءسات. ورازا ايتتا ادامدار ءبىر-بىرىنە جاقسى تىلەكتەر ايتىپ، قايىرىمدىلىق جاساپ، قۋانىشپەن ءبولىسۋى كەرەك.

ورازا ايتتا نە ىستەۋگە بولادى؟

- ايت نامازىن وقۋ - تاڭەرتەڭ مەشىتكە بارىپ، ايت نامازىن وقۋ - بۇل كۇننىڭ ەڭ ماڭىزدى امالدارىنىڭ ءبىرى؛

- تۋىستار مەن جاقىندارعا قوناققا بارۋ - اتا-انا، تۋعان-تۋىستار، كورشى-قولاڭمەن كەزدەسىپ، ايت مەرەكەسىمەن قۇتتىقتاۋ - ساۋاپتى ءىس؛

- قايىرىمدىلىق جاساۋ - جەتىم-جەسىرلەرگە، مۇقتاج جاندارعا كومەك كورسەتۋ، ساداقا بەرۋ - ورازا ايتتىڭ باستى قۇندىلىقتارىنىڭ ءبىرى؛

- تازا ءارى ادەمى كيىنۋ - بۇل كۇندە مۇسىلماندار تازا، ادەمى كيىم كيىپ، مەيرامدى ەرەكشە كوڭىل كۇيمەن قارسى الۋى كەرەك؛

- كەشىرىمدى بولۋ - رەنجىسكەن ادامدار تاتۋلاسىپ، ءبىر- ءبىرىن كەشىرۋى ماڭىزدى.

ورازا ايتتا نە ىستەۋگە بولمايدى؟

- بىرەۋدى رەنجىتۋ، ۇرىس-كەرىس - ايت كۇنى ادامدارعا تەك جىلى سوزدەر ايتىپ، ءبىر-بىرىنە قۇرمەت كورسەتۋ قاجەت؛

- تىم ارتىق ىسىراپ جاساۋ - داستارحان جايۋ - ءداستۇرىمىز، ءبىراق شەكتەن تىس ىسىراپتان اۋلاق بولۋ كەرەك؛

- جامان ءسوز ايتۋ، عايبات سويلەۋ - بۇل كۇن تەك جاقسى ويلار مەن يگى ىستەرگە ارنالۋعا ءتيىس؛

- ورازا ۇستاۋ - ايت كۇنى ورازا ۇستاۋعا بولمايدى، ويتكەنى بۇل كۇن - مەرەكە.

ورازا ايت - قۋانىش پەن مەيىرىمدىلىك مەيرامى. بۇل كۇنى ءار ادام جاقىندارىنا جىلۋلىق سىيلاپ، ساۋاپتى ىستەر اتقارۋعا تىرىسۋى كەرەك.