بۇگىن ەسكەندىر حاسانعاليەۆكە 85 جىل

الماتى. قازاقپارات – 13-اقپان – ق ر مەملەكەتتىك سىيلىعىنىڭ يەگەرى، قازاقستاننىڭ حالىق ءارتىسى ەسكەندىر حاسانعاليەۆتىڭ تۋعان كۇنى. ءتىرى بولعاندا قازاق مۋزىكا ونەرىنىڭ مايتالمانى 85 جاسقا تولار ەدى.

ەسكەندىر وتەگەن ۇلى حاسانعاليەۆ 1940-جىلى 13-اقپاندا باتىس قازاقستان وبلىسىندا تۋعان.

1959 -جىلى قۇرمانعازى اتىنداعى الماتى مەملەكەتتىك كونسەرۆاتورياسىنىڭ ۆوكالدى-حور فاكۋلتەتىن، 1978-جىلى ءال-فارابي اتىنداعى شىمكەنت مادەنيەت ينستيتۋتىن ءبىتىردى.

ءومىرىن ونەرگە ارناعان حاسانعالييەۆتىڭ «اتامەكەن»، «ادەمى»، «اسىل ارمان»، «ءومىرىمنىڭ جازى»، «ەسكىرمەگەن ماحاببات» اندەرىن بىلمەيتىن قازاق جوق.

قازاقتىڭ ءان ونەرىنە زور ۇلەس قوسقان سازگەردىڭ رەپەرتۋارىنداعى اۆتورلىق تۋىندىلارى ەل جۇرەگىنەن ويىپ تۇرىپ ورىن العان. شىعارماشىلىق عۇمىرىندا ورىس، تاتار، نەمىس اقىندارىنىڭ ولەڭدەرىنە دە ءان جازعان. 200 گە جۋىق ءان، رومانس جانە حورعا ارنالعان شىعارمالاردىڭ اۆتورى.

ماراپاتتارى: قازاقستاننىڭ حالىق ءارتىسى، ق ر مەملەكەتتىك سىيلىعىنىڭ، «قۇرمەت»، «وتان» وردەندەرىنىڭ يەگەرى. «پلاتيندى تارلان» سىيلىعىنىڭ لاۋرەاتى، «ق ر تاۋەلسىزدىگىنە 20 جىل مەدالى»، «ق ر تاۋەلسىزدىگىنە 25 جىل» مەدالىنىڭ يەگەرى، ورال پەداگوگيكا ينيستيتۋتى مەن شاكارىم اتىنداعى سەمەي مەملەكەتتىك ۋنيۆەرسيتەتىنىڭ قۇرمەتتى پروفەسسورى، باتىس قازاقستان وبلىسىنىڭ قۇرمەتتى ازاماتى.

كومپوزيتور 2021-جىلى 30-ساۋىردە كوروناۆيرۋستان قايتىس بولدى.

الماتى مۋزەيىندە ەسكەندىر حاسانعاليەۆتىڭ 85 جىلدىعىنا ارنالعان «اتامەكەن» - ەل رۋحى» اتتى كورمە اشىلدى. وندا كومپوزيتوردىڭ جەكە زاتتارى مەن فوتوسۋرەتتەرى، ماراپاتتارى، ساحنالىق كوستيۋمدەرى، پارتيتۋرالارى، مۋزىكالىق اسپاپتارى، افيشالار جانە وتباسىلىق زاتتارى تۇر.