بۇگىن Silk Way Star مەگا جوباسى 12 ەلدىڭ تەلەارناسىنان كورسەتىلەدى
استانا. KAZINFORM - بۇگىن ساعات 20:00 دە Jibek Joly تەلەارناسىندا، قىتايدىڭ CCTV-3 ارناسىندا جانە قاتىسۋشى ەلدەردىڭ ۇلتتىق ارنالارىندا كوپتەن كۇتكەن حالىقارالىق مەگاجوبا - Silk Way Star كورەرمەنگە جول تارتادى.
ونەر بايگەسىندە 12 ەلدىڭ تالانتتى انشىلەرى باق سىنايدى. ولاردىڭ ىشىندە قىتاي، وڭتۇستىك كورەيا، مالايزيا ەلدەرىنەن كەلگەن تالانتتار بار.
بيىل ماۋسىم ايىندا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) «Silk Way Star» حالىقارالىق جوباسى تۋرالى كەلىسىمگە قول قويدى. بۇل قۇجات قىتاي حالىق رەسپۋبليكاسى ءتوراعاسى سي ءتسزينپيننىڭ قازاقستان رەسپۋبليكاسىنا رەسمي ساپارى اياسىندا قابىلداندى.
«Silk Way Star» - ورتالىق ازيا ەلدەرى، كاۆكاز جانە قىتاي انشىلەرى قاتىساتىن العاشقى بىرلەسكەن مۋزىكالىق جوبا. جوبا اياسىندا بايقاۋلىق ونەر كورسەتۋلەر، شوۋ باعدارلامالار مەن گالا- كونسەرت جوسپارلانعان. ءار ءتۇرلى تىلدە شىرقالاتىن اندەر مەن جارقىن مادەني- مۋزىكالىق كوللابوراتسيالار مادەنيەتتەر اراسىنداعى ەرەكشە شىعارماشىلىق ديالوگتى قالىپتاستىرماق.
- بۇل - ەشقانداي فرانشيزا ەمەس، قازاقستاندىق مامانداردىڭ ويلاپ تاپقان جوباسى. وزدەرىڭىز بىلەسىزدەر، ەلىمىزدە كوپتەگەن تەلەارنالاردا كورسەتىلەتىن ءىرى مۋزىكالىق حالىقارالىق شوۋلار - شەت ەلدەردىڭ فرانشيزا ونىمدەرى. بۇل بايقاۋعا 12 ەلدەن قاتىسۋشىلار كەلەدى. بيىل ماۋسىم ايىندا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) «Silk Way Star» حالىقارالىق جوباسى تۋرالى كەلىسىمگە قول قويعان بولاتىن. سول كەلىسىمگە وراي، جوبانى كۇزگى ماۋسىمعا دايىنداپ جاتىرمىز، - دەدى «Jibek Joly/Silk Way» تەلەارناسىنىڭ باسقارۋشى ديرەكتورى ەركەجان كۇنتۋعان.
بايقاۋعا 12 ەل، اتاپ ايتقاندا ارمەنيا، ازەربايجان، گرۋزيا، قازاقستان، قىرعىزستان، قىتاي، مالايزيا، موڭعوليا، وڭتۇستىك كورەيا، وزبەكستان، تاجىكستان جانە تۇرىكمەنستان وكىلدەرى قاتىسادى. قاتىسۋشىلار قاتارىندا تانىمال ارتىستەرمەن قاتار، جاڭا ەسىمدەر دە بار. ال ءبىزدىڭ ەلدىڭ نامىسىن تالانتتى ءانشى، Alem لاقاپ اتىمەن تانىلعان باتىرحان مالىكوۆ قورعايدى.
- بۇل - زور جاۋاپكەرشىلىك. مەن جالپى بايقاۋلارعا قاتىسپاعالى كوپ بولدى جانە ساحنادا توپپەن ونەر كورسەتىپ جۇرگەننەن كەيىن بايقاۋعا قاتىسۋدى دا ۇمىتىپ قالىپپىن. سوندىقتان دا ۇسىنىس تۇسكەندە، ارينە، قانشالىقتى بۇل جوبادا ءوزىمدى كورسەتە الامىن دەپ كوپ ويلاندىم. ءبىراق قۋانا- قۋانا قابىل الدىم، ويتكەنى بۇل - مەن ءۇشىن كوك تۋىمىزدى الەمدىك ارەنادا جەلبىرەتەتىن بيىك مارتەبە. وسى مۇمكىندىك ءۇشىن كوپ-كوپ راحمەت! مەن بارىمدى سالىپ، جەڭىسكە جەتۋگە تىرىسامىن، - دەدى جاس ءانشى.
مۋزىكالىق سايىس ءتۇسىرىلىمى 2025 -جىلعى 20- تامىزدا باستالادى. گراند- فينال 22 -قاراشا كۇنى Jibek Joly/Silk Way تەلەارنالارىندا جانە بايقاۋعا قاتىسۋشى ەلدەردىڭ جەتەكشى تەلەارنالارىندا تىكەلەي ەفيردە كورسەتىلەدى.
جەڭىمپازعا SILK WAY STAR ەرەكشە اتاعى بەرىلىپ، ونەرىن جاھاندىق ساحنادا تانىتۋ مۇمكىندىگى ۇسىنىلادى.
كەلەسى جىلى Silk Way Star بايقاۋى قىتايدا وتەدى. ال ودان كەيىنگى جىلدارى بۇل بايقاۋدى وتكىزۋگە وزگە دە ازيا ەلدەرى ۇسىنىس جاساسا، ولارعا بايقاۋدى وتكىزۋ مۇمكىندىگى بەرىلمەك.
سونىمەن قاتار Jibek Joly/Silk Way جاڭا ماۋسىمدا رەاليتي- شوۋلار، ساراپتامالىق سالماقتى باعدارلامالار مەن ەڭبەك ادامدارى جايلى بىرەگەي جوبالار ۇسىنادى.