بۇگىن ەۋروپا چەمپيوناتىندا قاي قۇرامالار وينايدى

استانا. KAZINFORM - فۋتبولدان 2024-جىلعى ەۋروپا چەمپيوناتىنىڭ سەگىزىنشى ويىن كۇنى، 21-ماۋسىمدا ءۇش ويىن وتەدى.

ەڭ الدىمەن 18:00 دە ە توبىندا سلوۆاكيا مەن ۋكراينا وينايدى.

كەزدەسۋ ديۋسسەلدورف قالاسىنداعى «مەركۋر شپيل-ارەنا» ستاديونىندا بولادى.

ەكى قۇراما بۇعان دەيىن سەگىز مارتە كەزدەستى. ۋكراينا ءۇش، سلوۆاكيا ەكى مارتە جەڭىسكە جەتسە، قالعانى تەڭ ناتيجەمەن اياقتالدى.

بۇل توپتاعى رۋمىنيا مەن بەلگيا كەزدەسۋى 22-ماۋسىمدا وتكىزىلەدى.

سونداي-اق D توبىنداعى پولشا مەن اۆستريا كەزدەسۋى 22.00 گە بەلگىلەنگەن.

قازىرگە دەيىن قۇرامالار ون ءبىر ويىندا كەزدەسىپ، بەسەۋىندە پولشا، تورتەۋىندە اۆستريا باسىم تۇسسە، قالعانىندا تەڭ ناتيجە تىركەلدى.

كەزدەسۋ بەرلين قالاسىنداعى «وليمپياشتاديون» ستاديونىندا بولادى.

اتالعان توپتاعى نيدەرلاند جانە فرانسيا كەزدەسۋى 00.00 گە بەلگىلەنگەن.

قۇرامالار قازىرگە دەيىن وتىز ەكى مارتە كەزدەسىپ، ون ءبىرى نيدەرلاند، ون جەتىسى فرانسيانىڭ باسىمدىعىمەن اياقتالسا، قالعانىندا تەڭ ناتيجەگە قاناعات ءبىلدىردى.

ويىن لەيپتسيگ قالاسىنداعى «رەد بۋلل-ارەنا - سەنترالشتاديون» ستاديونىندا وتەدى.

العاشقى تۋردا فرانسيا اۆستريانى 1:0، نيدەرلاند پولشانى 2:1 ەسەبىمەن تىزە بۇكتىردى.

كوش باسىندا ءۇش ۇپايمەن فرانسيا مەن نيدەرلاند كەلەدى. ال پولشا مەن اۆستريانىڭ ەنشىسىندە ۇپاي جوق.

ويىنداردىڭ ءبارى Qazsport تەلەارناسىنان تىكەلەي ەفيردە كورسەتىلەدى.

ەسكە سالساق، 20-ماۋسىمدا ۆ توبىندا يسپانيا يتاليانى 1:0، ەسەبىمەن جەڭسە، س توبىندا سلوۆەنيا مەن سەربيا، انگليا مەن دانيا 1:1 ەسەبىمەن تەڭ ءتۇستى.