بۇگىن قازاقتىڭ روزاسىنىڭ تۋعان كۇنى

الماتى. KAZINFORM - بۇگىن كۇمىس كومەي، جەز تاڭداي ءانشى روزا رىمبايەۆانىڭ تۋعان كۇنى.

ءانشىنىڭ ۇلكەن ۇلى ءالي وقاپوۆ Instagram-داعى پاراقشاسىنا اناسىن قۇتتىقتادى.

روزا رىمبايەۆا 1957 -جىلى 28-قازاندا سەمەي وبلىسى جاڭعىزتوبە اۋدانىندا دۇنيەگە كەلگەن.

ايتا كەتسەك، روزا رىمبايەۆا قازاق ەسترادا ءانشىسى، پروفەسسور ءارى اكتريسا، قازاقستاننىڭ حالىق ءارتىسى، مەملەكەتتىك سىيلىقتىڭ يەگەرى، بىرنەشە حالىقارالىق كونكۋرستاردىڭ لاۋرەاتى. قۇرمەت جانە پاراسات وردەندەرىنىڭ يەگەرى. قىرعىزستاننىڭ (2000) جانە وزبەكستاننىڭ (1984) ەڭبەك سىڭىرگەن ءارتىسى. 1977-1979 -جىلدارى «پەسنيا گودا» فەستيۆالىنىڭ اقتىق سايىسىندا جانە كسرو- نىڭ ەڭ ۇزدىك «زۆۋكوۆايا دوروجكا» حيت- پارادىندا (1978 ج. 3-ورىندا اللا پۋگاچيەۆا جانە سوفيا روتارۋدان كەيىن) جوعارى ورىننان كورىنىپ، ۇلكەن تانىمالدىلىققا يە بولعان.

ءانشى حالىق اراسىندا كينواكتريسا رەتىندە دە تانىمال. ول «دو سۆيدانيا، مەدەو» فيلمىندە باستى ءرولدى سومدادى، ءارى «پەرۆايا پەسنيا» فيلمى، «جەنسكي ۆزگلياد»، «روزا رىمبايەۆا»، «روزا»، «حۆوست كومەتى»، «ي سنوۆا زدراۆستۆۋيتە» دەرەكتى فيلمدەرىنە ءتۇستى.