بۇگىن ماگيستراتۋراعا تۇسۋگە ارنالعان كەشەندى تەستىلەۋ باستالدى

استانا. KAZINFORM - بۇگىن ماگيستراتۋراعا تۇسۋگە ارنالعان كەشەندى تەستىلەۋ باستالدى، ول 23-قاراشاعا دەيىن جالعاسادى، دەپ حابارلايدى عىلىم جانە جوعارى ءبىلىم مينيسترلىگىنىڭ باسپا ءسوز قىزمەتى.

بۇعان دەيىن كەشەندى تەستىلەۋدى تاپسىرۋعا ءوتىنىش قابىلداۋ 28- قازان مەن 10-قاراشا ارالىعىندا ق ر ع ج ب م ۇلتتىق تەستىلەۋ ورتالىعىنىڭ سايتىندا app.testcenter.kz جۇزەگە اسىرىلدى.

ماگيستراتۋراعا تۇسۋگە ارنالعان كەشەندى تەستىلەۋگە 11 مىڭعا جۋىق ءوتىنىش قابىلداندى. ەڭ كوپ تاڭدالعان ءبىلىم بەرۋ باعىتتارى قاتارىندا «پەداگوگيكالىق عىلىمدار»، «ينجەنەرلىك، وڭدەۋ جانە قۇرىلىس سالالارى» جانە «بيزنەس، باسقارۋ جانە قۇقىق» بار.

- عىلىمي-پەداگوگيكالىق ماگيستراتۋراعا ءتۇسۋ ءۇشىن كەشەندى تەستىلەۋ ەلەكتروندىق فورماتتا وتكىزىلەدى جانە ءۇش بولىمنەن تۇرادى: شەت ءتىلى بويىنشا تەست، وقۋعا دايىندىعىن انىقتاۋعا ارنالعان تەست جانە ءبىلىم بەرۋ باعدارلامالارى توبىنىڭ بەيىنى بويىنشا تەست. بارلىعىنا 3 ساعات 55 مينۋت بەرىلەدى. شەكتى بال - 75 بال، - دەلىنگەن حابارلامادا.

ەستەرىڭىزگە سالا كەتسەك، بيىل بەيىندى ماگيستراتۋراعا ءتۇسۋ فورماتىنا وزگەرىستەر ەنگىزىلدى. بەيىندى ماگيستراتۋراعا تۇسۋگە نيەتتى ۇمىتكەرلەر «وقۋعا دايىندىعىن انىقتاۋعا ارنالعان تەست» بولىمىنەن بوساتىلدى. وسىلايشا، ولار تەك ءبىلىم بەرۋ باعدارلامالارى توبىنىڭ بەيىنى بويىنشا تەست تاپسىرادى. شەكتى بال كەمىندە 30 بال، ونىڭ ىشىندە ءاربىر بەيىندى ءپان بويىنشا كەمىندە 7 بالدى قۇرايدى.

تەستىلەنۋشى اپەللياتسياعا تەحنيكالىق سەبەپتەر بويىنشا تەستىلەۋ بارىسىندا، تەستىلەۋ تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە ءوتىنىش بەرە الادى. اپەللياتسيا بەس كۇن ىشىندە قاراستىرىلادى، ودان سوڭ سەرتيفيكات وقۋعا ءتۇسۋشىنىڭ جەكە كابينەتىندە قولجەتىمدى بولادى.

ماگيستراتۋرادا وقۋ ءۇشىن قىسقى قابىلداۋعا 4 مىڭنان استام گرانت بولىنگەن.

بۇعان دەيىن حابارلاعانىمىزداي، مينيسترلىك ماگيستراتۋرا مەن دوكتورانتۋراعا تۇسۋشىلەرگە ماڭىزدى حابارلاندىرۋ جاساعان بولاتىن.

اۆتور

اينۇر تۋماكبايەۆا