بۇگىن ەلىمىزدىڭ باسىم بولىگىندە كۇن اشىق بولادى

استانا. KAZINFORM - «قازگيدرومەت» ر م ك- سى قازاننىڭ 1-كۇنگى كۇن رايى بولجامىن جاريالادى.

كاسىپورىننىڭ دەرەكتەرىنە قاراعاندا، بۇگىن قازاقستاننىڭ باسىم بولىگىندە جوعارى قىسىم ءورىسىنىڭ اسەرىنەن كۇن قۇرعاق جانە جىلى بولادى. تەك اتموسفەرالىق اعىن اسەر ەتىپ وتىرعان ەلدىڭ وڭتۇستىگىندە عانا نايزاعاي ويناپ، جاڭبىر جاۋادى.

قازاقستاننىڭ باتىسىندا، وڭتۇستىگىندە، شىعىسىندا جەل كۇشەيەدى، سولتۇستىگىندە، وڭتۇستىك شىعىسىنداعى تاۋلى اۋدانداردا تۇمان ءتۇسىپ، وڭتۇستىگىندە شاڭدى داۋىل تۇرادى.

اقتوبە، قاراعاندى وبلىستارىندا، ۇلىتاۋ وبلىسىنىڭ شىعىسىندا، جەتىسۋ وبلىسىنىڭ شىعىسىندا، باتىس قازاقستان وبلىسىنىڭ سولتۇستىگىندە، قىزىلوردا وبلىسىنىڭ سولتۇستىك-باتىسىندا، جامبىل وبلىسىنىڭ وڭتۇستىك-شىعىسىندا، قوستاناي وبلىسىنىڭ وڭتۇستىگىندە، ورتالىعىندا، ماڭعىستاۋ وبلىسىنىڭ شىعىسىندا، شىعىس قازاقستان وبلىسىنىڭ باتىسىندا، وڭتۇستىگىندە، ورتالىعىندا، اباي وبلىسىنىڭ شىعىسىندا، ورتالىعىندا ءورت قاۋپى ساقتالادى. اباي جانە شىعىس قازاقستان وبلىستارىنىڭ سولتۇستىگىندە جوعارى ءورت قاۋپى بار.

ماڭعىستاۋ، اتىراۋ، تۇركىستان، قىزىلوردا، جامبىل، باتىس قازاقستان، ۇلىتاۋ وبلىستارىندا، قاراعاندى وبلىسىنىڭ باتىسىندا، شىعىسىندا، اباي وبلىسىنىڭ وڭتۇستىگىندە، جەتىسۋ وبلىسىنىڭ باتىسىندا، سولتۇستىگىندە، ورتالىعىندا، جەتىسۋ وبلىسىنىڭ ورتالىعىندا، الماتى وبلىسىنىڭ سولتۇستىگىندە، شىعىسىندا، اقتوبە وبلىسىنىڭ باتىسىندا، وڭتۇستىگىندە، ورتالىعىندا توتەنشە ءورت قاۋپى ساقتالادى.