بۇگىن ەل اۋماعىندا جەل كۇشەيىپ، شاڭدى داۋىل سوعادى

استانا. KAZINFORM - «قازگيدرومەت» ر م ك ەل اۋماعىندا 6-ماۋسىمدا بولاتىن قاۋىپتى مەتەورولوگيالىق قۇبىلىستارعا بولجام جاسادى.

سينوپتيكتەردىڭ مالىمەتىنشە، قازاقستان تەرريتورياسىنىڭ باسىم بولىگىندە اتموسفەرالىق فرونتالدى بولىكتەر وتۋىنە بايلانىستى، تۇراقسىز اۋا رايى ساقتالادى. نايزاعاي ويناپ، وتكىنشى جاڭبىر، كۇندىز باتىستا، سولتۇستىكتە بۇرشاق جاۋادى.

«ەلىمىزدىڭ سولتۇستىگىندە، شىعىسىندا تۇندە جانە تاڭەرتەڭ تۇمان كۇتىلەدى. تەك ەلىمىزدىڭ وڭتۇستىك- باتىسىندا جاۋىن-شاشىنسىز اۋا رايى ساقتالادى. رەسپۋبليكا بويىنشا جەلدىڭ كۇشەيىپ، كۇندىز باتىستا شاڭدى داۋىل سوعادى»، - دەلىنگەن حابارلامادا.

اقتوبە، قىزىلوردا، ماڭعىستاۋ، اتىراۋ، تۇركىستان، جامبىل، الماتى، جەتىسۋ وبلىستارىندا، باتىس قازاقستان وبلىسىنىڭ سولتۇستىگى مەن شىعىسىندا، قوستاناي، قاراعاندى، اباي وبلىستارىنىڭ وڭتۇستىگىندە، ۇلىتاۋ وبلىسىنىڭ وڭتۇستىگى مەن ورتالىعىندا جوعارى ءورت قاۋىپى ساقتالادى.

تۇركىستان وبلىسىنىڭ ءشولدى اۋداندارىندا، قىزىلوردا وبلىسىنىڭ شىعىسىندا، باتىس قازاقستان، اتىراۋ، اقتوبە وبلىستارىنىڭ باتىسىندا، وڭتۇستىگىندە توتەنشە ءورت قاۋىپى كۇتىلەدى.