بۇگىن - انۋاربەك بايجانبايەۆتىڭ تۋعان كۇنى

ايگىلى ديكتور، قازاقستاننىڭ حالىق ءارتىسى انۋاربەك نىعمەتجان ۇلى بايجانبايەۆ 1923 -جىلى 26-ناۋرىزدا دۇنيەگە كەلگەن.

بۇكىل ءومىرى كەيىنگىگە ۇلگى بولار اسىل تۇلعا انۋاربەك بايجانبايەۆ ەڭبەك جولىن 1931 -جىلى الماتىدا، مەكتەپتە وقىپ جۇرگەن شاعىندا باستاعان. قالاعا كوشىپ كەلگەن اتا-اناسىنا قولعابىس ەتۋ ماقساتىندا «سوتسياليستىك قازاقستان» گازەتىنىڭ باسپاحاناسىندا حات تاسۋشى بولىپ جۇمىس ىستەگەن.

ساكەن سەيفۋللين، مۇحتار اۋەزوۆ، ءسابيت مۇقانوۆ سەكىلدى كلاسسيك جازۋشىلارعا حاتتار، قولجازبالار، كىتاپتار جەتكىزىپ وتىرعان.

1940 -جىلى قازاق كوممۋنيستىك جۋرناليستيكا ينستيتۋتىنا وقۋعا تۇسەدى. سوعىس باستالعاندا العاشقىلاردىڭ ءبىرى بولىپ سوعىسقا اتتانعان ول 1943 -جىلى مايداندا اياعىنان اۋىر جارالانىپ، ەلگە ورالادى.

سول جىلى كەزىندە باسپاحانادا بىرگە جۇمىس ىستەگەن، كەيىن رەسپۋبليكالىق راديو تاراتۋ كوميتەتىنىڭ باسشىسى بولعان ومارعازى وسپانوۆ ونى راديوعا ديكتورلىققا شاقىرادى. ءا. بايجانبايەۆ سودان باستاپ ءومىرىنىڭ سوڭىنا دەيىن راديودا قىزمەت اتقارعان.

قازاق راديوسىنىڭ «التىن قورىندا» بۇگىندە ايگىلى ديكتوردىڭ وقۋىندا 400 دەن استام جازبا، ون مىڭداي ادەبي، مۋزىكالىق حابارلار ساقتاۋلى. ونىڭ جەڭىستى حابارلاعانداعى مالىمەتى - باعا جەتپەس اسىل مۇرا.

انۋاربەك بايجانبايەۆتىڭ اسەرلى ءسوز ساپتاۋى بورىكتىلەر داۋىسىنىڭ ەتالونىنا اينالدى. اتاقتى لەۆيتانعا ەلىكتەمەسە دە، شەبەرلىككە دەگەن قۇرمەت پەن سۇيىسپەنشىلىك ونى ءبارىبىر «قازاقتىڭ لەۆيتانى» اتاندىردى.

ءبىر ايتا كەتەرلىگى، ەگەر لەۆيتان تەك رەسمي حابارلاردى وقۋمەن شەكتەلسە، انۋاربەك بايجانبايەۆ بارلىق دەرلىك جانرلاردا - حابارلار مەن تۋىندىلاردى دا شەبەر وقۋىمەن ەرەكشەلەنگەن. ول ادەبي تۋىندىلاردى، ولەڭ-جىرلاردى اۋەزدى ەتىپ وقىعاندا، تىڭداعان ادام ەرىكسىز قۇلاق تۇرەتىن.

انۋاربەك بايجانبايەۆ 1989 -جىلى 21-قازاندا 66 جاسىندا دۇنيە سالدى.