بۇگىن -ادىلەت ورگاندارى قىزمەتكەرلەرىنىڭ كۇنى

استانا. KAZINFORM - بۇگىن - ادىلەت ورگاندارى قىزمەتكەرلەرىنىڭ كاسىبي مەرەكەسى. قازاق ەلىندەگى ادىلەت ورگاندارىنىڭ العاش قۇرىلۋىنا ۇلت ۇستازى احمەت بايتۇرسىنوۆ نەگىز بولعان.

1929 -جىلى قازاق ريەۆوليۋتسيالىق كوميتەتىنىڭ وتىرىسىندا اسكەري-ريەۆوليۋتسيالىق كوميتەت مۇشەسى احمەت بايتۇرسىنوۆ بايانداما جاساپ، وندا قازاق ەلىنىڭ دەربەس ادىلەت ورگانى قۇرىلۋى كەرەك دەگەن باستاما كوتەرگەن. ۇسىنىس قابىل الىنىپ، ريەۆوليۋتسيالىق كوميتەت ادىلەت ءبولىمىن قۇردى.

قازاقستاندا ادىلەت ورگاندارى كۇنى االعاش رەت ادىلەت ورگاندارىنىڭ كۇنى 2012 -جىلى اتالىپ ءوتتى.

ادىلەت ورگاندارى - ادىلەت مينيسترلىگىنىڭ بارلىق مەكەمەلەرى مەن ۆەدومستۆولارىنىڭ جيىنتىق اتاۋى. تاريحى تەرەڭدە جاتقان ادىلەت ورگانى 1919 -جىلى قۇرىلىپ، ءوزى ءومىر سۇرگەن جۇزدەن اسا جىل ىشىندە ەل ومىرىندە بولعان اسا ەلەۋلى تاريحي وقيعالاردىڭ بەل ورتاسىندا بولىپ، ساياسي، قۇقىقتىق جانە الەۋمەتتىك- ەكونوميكالىق ومىردەگى كۇردەلى وزگەرىستەرگە اتسالىستى. 1920-جىلى ادىلەت حالىق كوميسسارياتى رەتىندە قۇرىلسا، 1946-جىلى ادىلەت مينيسترلىگى بولىپ قايتا اتالدى. جالپىلاما ايتقاندا، حالىققا زاڭ قىزمەتىن ۇسىنىپ، ازاماتتاردىڭ بوستاندىقتارى مەن مۇددەلەرىن قورعايتىن بىردەن ءبىر ورگان.

ەلىمىز تاۋەلسىزدىك العاننان سوڭ ادىلەت ورگاندارى ءۇشىن جاڭا كەزەڭ باستالدى. ادىلەت مينيسترلىگى جانە ونىڭ ورگاندارى تۇبىرىمەن وزگەرىپ، جاڭا سيپاتقا يە بولدى. وسىلايشا، ءوزىنىڭ سان قىرلى قىزمەتىنىڭ ارقاسىندا ەگەمەندى مەملەكەتتىڭ قۇقىقتىق ساياساتىن جۇزەگە اسىرۋ ىسىنە ۇلەس قوسىپ كەلەدى. باعدارلانعان مىندەتتەر نەگىزىندە ەلىمىزدىڭ ادىلەت ورگاندارى جاڭا كەزەڭ تالابىنا وراي مەملەكەتتىك قۇقىقتىق رەفورمانى قالىپتاستىرىپ، جۇمىسىن دامىتىپ كەلەدى.

بۇل مەرەكە -كونستيتۋتسيالىق مەملەكەتتىڭ تۇتاستىعىن قامتاماسىز ەتىپ جۇرگەن ادىلەت قىزمەتكەرلەرىنىڭ باسىن بىرىكتىرەتىن ايتۋلى كۇن.

بۇگىندە ەلىمىزدە حالىقارالىق ستاندارتتاردىڭ تالاپتارىنا ساي زاڭدى نەگىز قالانىپ، ادىلەت ورگاندارىنىڭ قۇزىرى كەڭەيتىلدى، جاڭا مىندەتتەر قويىلدى، اشىق راسىمدەر نەگىزىندە ادىلەت قىزمەتكەرلەرىنىڭ كاسىبي كورپۋسى جاساقتالدى.