بۇگىن - اباي كۇنى

استانا. KAZINFORM - بۇگىن - اباي كۇنى. 10- تامىز رەسمي تۇردە اقىن اباي قۇنانباي ۇلىنىڭ تۋعان كۇنى دەپ ەسەپتەلەدى.

قازاق ادەبيەتىنىڭ ەڭ ءىرى تۇلعاسى تۋعان كۇندى وسىلاي دارىپتەپ جاتساق، تۋعان ولكەسىنە قانداي قۇرمەت كورسەتىپ جاتىرمىز؟ اقىننىڭ ازان شاقىرىپ قويعان اتى - يبراھيم. 1845 -جىلى قازىرگى اباي وبلىسىنىڭ اباي اۋدانىنداعى قاراۋىل اۋىلىندا دۇنيەگە كەلگەن. ارادا 25 جىل وتكەندە ابايدى دۇنيەگە اكەلگەن ءوڭىر قايتادان وبلىس مارتەبەسىن الىپ، ابايدىڭ اتىمەن اتالدى. وسىلايشا قازىر ەلىمىزدە ەكى اقىننىڭ اتىندا وبلىس بار. ءبىرى - جامبىل، ەكىنشىسى - اباي.

اباي مۇراسى دەگەندە ەسكە جۇزدەگەن ولەڭى مەن ونداعان ءانى، پوەمالارى مەن 50-گە جۋىق «قارا ءسوزى» تۇسەدى. ورىس ادەبيەتىنەن پۋشكين مەن كرىلوۆتى، باتىس ادەبيەتىنەن گەتە مەن بايروندى اۋداردى. «ماسعۇت»، «ەسكەندىر» پوەمالارىن وقىعان ادام اقىننىڭ شىعىس ادەبيەتىنىڭ جاۋھارلارىمەن ەتەنە تانىس بولعانىنا كوز جەتكىزەدى. باتىس پەن شىعىس ادەبيەتىن تەل ەمىپ، ودان العان ازىعىمەن قازاق ادەبيەتىن بايىتقان ويشىلدى ۇلت رۋحانياتىنىڭ رەفورماتورىنا تەڭەيتىندەر بار.

ادەبيەت تەورياسىندا ابايدى قازاقتىڭ جازبا ادەبيەتىنىڭ باستاۋىنداعى تۇلعا دەپ سيپاتتالادى. وزىنەن كەيىنگى «ابايدىڭ اقىندىق مەكتەبى» دەپ ايدار تاعىلعان بۋىن الاش زيالىلارىنىڭ ادەبي دامۋىنا اسەر ەتىپ، ۇلگى بولدى.

«قازاقتىڭ باس اقىنى - اباي قۇنانبايەۆ. ونان اسقان بۇرىنعى- سوڭعى زاماندا قازاق دالاسىندا ءبىز بىلەتىن اقىن بولعان جوق»، - دەپ جازدى ۇلت ۇستازى احمەت بايتۇرسىن ۇلى.

اباي قۇنانباي ۇلىنا بەرىلگەن ەڭ ادىلەتتى، ەڭ بيىك باعا دا وسى.