بۇگىن 2024 -جىلعى پاريج وليمپياداسى سالتاناتتى تۇردە اشىلادى

استانا. KAZINFORM - بۇگىن 2024 -جىلعى پاريج وليمپياداسى سالتاناتتى تۇردە اشىلادى.

ءدۇبىرلى دودا 26 -شىلدە مەن 11 -تامىز ارالىعىندا وتەدى. ويىنعا الەمنىڭ 205 ەلىنەن سپورتشىلار قاتىسادى دەپ جوسپارلانعان. بۇگىنگى ويىنداردىڭ اشىلۋ سالتاناتىنا وراي كوشەدە قاۋىپسىزدىك قىزمەتتەرى دە كۇشەيگەن.

رەسمي ەمەس دەرەك كوزدەرىنە سۇيەنسەك، اشىلۋ سالتاناتىندا وليمپيادا الاۋىن جەڭىل اتلەتيكادان ءۇش دۇركىن وليمپيادا چەمپيونى ماري-جوزە پەرەك مەن داڭقتى فۋتبولشى زينەدين زيدان جاعۋى مۇمكىن. 2024 -جىلعى وليمپيادا ويىندارىنىڭ ۇيىمداستىرۋ كوميتەتىنىڭ باسشىسى توني ەستانگەنىڭ اشىلۋ سالتاناتى تۋرالى از-كەم اقپارات بەردى.

«وليمپيادانىڭ اشىلۋ سالتاناتى قانشالىقتى ماڭىزدى ەكەنىن بىلەمىز. سوندىقتان دا، ءبىز ءاۋ باستان قۇلشىنىسىمىز مىقتى بولدى. بۇل اشىلۋ سالتاناتى ءبىزدىڭ ويىنعا دەگەن قۇلشىنىسىمىزدى كورسەتىپ، فرانسياداعى جاقسى نارسەلەردىڭ ءبارىن پاش ەتكەنىن قالايمىز»، - دەدى ول.

سپورتشىلار شەرۋى سەنا وزەنىندە وتەدى. ءاربىر دەلەگاتسيا ءوز قايىعىمەن ءجۇزىپ وتەدى. باعىتتىڭ ۇزاقتىعى التى شاقىرىم. قازاقستاندىق سپورتشىلار وليمپيادا ويىندارىندا سپورتتىڭ 25 تۇرىنەن سىنعا تۇسەدى. ەلىمىزدىڭ اتىنان 80 سپورتشى 92 جولداما جەڭىپ العان بولاتىن.

قازاقستان قۇراماسىنىڭ تۋىن اسلانبەك شىمبەرگەنوۆ پەن ولگا سافرونوۆا ۇستاپ شىعادى. پاريج وليمپياداسى قازاقستاننىڭ تاۋەلسىز ەل رەتىندە قاتىسقالى وتىرعان سەگىزىنشى جازعى وليمپياداسى بولماق. سونداي-اق، ەۋروپا قۇرلىعىندا ءۇشىنشى رەت (افينا، لوندون، پاريج) باق سىنايدى.

قازاقستاندىق سپورتشىلار بوكس، دزيۋدو، سپورتتىق گيمناستيكا، جەڭىل اتلەتيكا، بايداركا مەن كانوەدە ەسۋ، وقپەن اتۋ، سەمسەرلەسۋ، گرەك-ريم كۇرەسى، ەركىن كۇرەس، ساداق اتۋ، ستەندتىك اتۋ، تەننيستەن سىنعا تۇسەدى.

سونداي- اق ولار ۆەلوشوسسە، ءجۇزۋ، زاماناۋي بەسسايىس، تاەكۆوندو، ۆەلوترەك، باتۋت گيمناستيكاسى، بادمينتون، اكادەميالىق ەسۋ، كوركەم گيمناستيكا، ترياتلون، ۇستەل تەننيسى، قۇزعا شىعۋ جانە برەيكينگتەن جارىس جولىنا شىعادى.

وليمپيادا ويىندارىنىڭ جەڭىمپازدارى مەن جۇلدەگەرلەرى ەيفەل مۇناراسىنىڭ ەتەگىندەگى تروكادەرودا ورنالاسقان چەمپيوندار ساياباعىندا ماراپاتتالادى.

اۆتور

ءادىلجان ۇمبەت