ەڭبەگىمدى دالەلدەي الماي، جارتى عاسىر ءومىر ءوتىپ بارادى: مايرا مۇحامەد قىزى وكىنىشىن جەتكىزدى
الماتى. قازاقپارات - وپەرا ءانشىسى كەزىندە شەتەلدەن شاقىرتۋ السا دا، ءوز ەلىندە قالۋدى ءجون كورگەنىن ايتادى. بەلگىلى وپەرا ءانشىسى مايرا مۇحامەد قىزى ونەر سالاسىندا ءجۇرىپ، «حالىق ءارتىسى» اتاعىن الماعانىن جەتكىزدى، - دەپ حابارلايدى Aikyn.kz.
ونەر يەسى قىرعىز رەسپۋبليكاسى ۇلتتىق كونسەرۆاتورياسىنىڭ «قۇرمەتتى پروفەسسورى» اتاعىنا يە بولعان.
«قىرعىز رەسپۋبليكاسى مادەنيەت مينيسترلىگىنىڭ ۇيىمداستىرۋىمەن ەلارالىق فورۋم الەمنىڭ 52 ەلىنەن كەلگەن قوناقتاردى بەي-جاي قالدىرمادى. بۇل كەزدەسۋ مۋزىكا سالاسىندا سەنساتسيا بولدى. قىرعىزستان ۇلتتىق كونسەرۆاتوريا رەكتورى ءارى حالىق ءارتيسى كومپوزيتور مۇراتبەك بەگاليەۆ مىرزانىڭ الەمدىك ارەناداعى بەدەلى مەن شاقىرۋىنىڭ ارقاسىندا ۇمتىلماس تاريحي كەشتەر ءوتىپ جاتىر»، - دەيدى ونەر يەسى.
كەزىندە شەتەلدەن شاقىرتۋ السا دا، ءوز ەلىندە قالۋدى ءجون كورگەنىن ايتادى.
«مەن استانا شابىت اكادەمياسىندا بەس جىل ۆوكالدان ساباق بەرىپ مەنىڭ شاكىرتتەرىم حالىقارالىق جۇلدەلەر الىپ جەڭىسپەن ورالعاندا ەڭبەگىمدى ەشكىم باعالاعان ەمەس. سونداعى العان جالاقى 17000 تەڭگە. كۇلكىم كەلەدى ويلاسام. قايران ۋاقىت پەن سارقىلعان قۋاتىڭ. ال قىرعىز باۋىرلار قىرعىزستان ۇلتتىق كونسەرۆاتوريانىڭ پروفەسسور اتاعىن باياعىدا بەرىپ قويعان ماعان. ال بىزدەگى اتاق جايلى ويلاۋدىڭ ءوزى جانىڭا باتادى. حالىق ءارتىسى اتاعى جاڭعىرعان بىلتىرعى ماراپاتتا ماعان نەگە بەرىلمەگەنىن ايتپاي-اق قويايىن. ەڭبەگىمدى قازاققا دالەلدەي الماي، باعالاتا الماي جارتى عاسىر ءومىر ءوتىپ بارادى. «ۋ ۆاس ۆسە ۆپەرەدي» دەيتىندەرگە ايتارىم، اتاڭنىڭ باسى!.. ءبارىن ايت تا ءبىرىن ايت، لاريسا گەرگيەۆامەن 30 جىلدان سوڭ كەزدەسكەن بۇل كەش تالاي وتكەندى ەسكە سالدى. 1995 -جىلى حالىقارالىق ريمسكي-كورساكوۆ كونكۋرسىنا قاتىسقان كەزىمدە لاريسا اپامنىڭ «مارينسكي تەاترعا قالساڭىزشى، ۆالەري گەرگيەۆ جاڭا ديرەكتور بولدى. تالانتتى جاس انشىلەردى قولدايدى» دەگەن ۇسىنىسىنا ورىسشا بىلمەگەنىم ءۇشىن جۇرەكسىنىپ، راقمەتىمدى ايتىپ ەلگە ورالعان بولاتىنمىن. كەشە اپام سونى ايتىپ، «ال ەندى نە بولدى، سەن سول كەزدە مەنى تىڭداعانىڭدا وسى كۇنى قاي جەردە جۇرەر ەدىڭ؟» دەگەندە، جاستىق شاقتا ىستەگەن قاتەمدى ەندى ءتۇسىندىم،
«ەتو سۋدبا، ماەسترو» دەگەننەن باسقا ءسوز تاپپادىم. ءيا، تاعدىر ءوز قولىڭدا. «قاسىڭدا دۇرىس جول سىلتەپ، اقىل ايتاتىن ۇستازىڭ بولسىن» دەگىم كەلەدى جاستارعا!» - دەيدى وپەرا ءانشىسى.