بىلتىرعى قۇرىلتايدان كەيىن 10 زاڭ جوباسى ازىرلەندى - ايماعامبەتوۆ

استانا. KAZINFORM - ۇلتتىق قۇرىلتاي جىلدان-جىلعا ماڭىزدى الاڭعا اينالىپ كەلەدى. بۇل پىكىردى پارلامەنت ءماجىلىسىنىڭ دەپۋتاتى اسحات ايماعامبەتوۆ ايتتى.

دەپۋتاتتىڭ ايتۋىنشا، بۇل جاي عانا تالقىلاۋ ەمەس، قوعام ءۇشىن وزەكتى ماسەلەلەردى انىقتاۋعا، ال بيلىككە - ولاردى ناقتى زاڭدى تۇرعىدا راسىمدەپ، ىسكە اسىرۋعا مۇمكىندىك بەرەتىن مەحانيزم.

- قۇرىلتايدا كوتەرىلگەن تاقىرىپتاردىڭ باسىم بولىگى الەۋمەتتىك ساياساتقا، مادەنيەتكە جانە قوعامدىق قۇندىلىقتارعا تىكەلەي قاتىستى بولعاندىقتان، سالالىق كوميتەت ءتوراعاسى رەتىندە مەن دە وسى جۇمىستارعا تىكەلەي قاتىسامىن. سوندىقتان، قۇرىلتايدىڭ ناتيجەلى فورمات ەكەنىن نىق سەنىممەن ايتا الامىن. اتىراۋدا وتكەن ءۇشىنشى قۇرىلتايدىڭ قورىتىندىسى بويىنشا 10 زاڭ جوباسى قولعا الىندى، ونىڭ 9 ىنا پرەزيدەنت قول قويدى. زاڭ جوبالارىنىڭ كوپشىلىگى ءبىزدىڭ كوميتەت ارقىلى ءوتتى، - دەپ جازدى ا. ايماعامبەتوۆ ءوزىنىڭ Telegram پاراقشاسىندا.

نەگىزگى وزگەرىستەر اراسىندا ويىن بيزنەسىن جارنامالاۋعا تىيىم سالۋ، تاريحي ەسكەرتكىشتەر مەن تابيعي نىسانداردى قورعاۋ، ماراپات جۇيەسىن كەڭەيتۋ، ايەلدەر مەن بالالاردى زورلىق-زومبىلىقتان قورعاۋ، باتىرلار ەسىمىن ۇلىقتاۋ، ەسىرتكى قىلمىسىنا جازانى كۇشەيتۋ، ونوماستيكا ەرەجەلەرىن جاڭارتۋ، وڭىرلىك رامىزدەردى رەتتەۋ باستامالارى بار.

سونىمەن بىرگە، ارحەولوگيا سالاسىن رەفورمالاۋ جۇمىستارى جوسپارلانىپ وتىر. وندا ليتسەنزيالاۋدىڭ جاڭا ستاندارتتارى ەنگىزىلەدى، زاڭسىز قازبا جۇمىستارى ءۇشىن جازالاۋ شارالارى كۇشەيتىلەدى. زاڭ جوباسى بويىنشا جۇمىستار بيىل 29-قاڭتاردا باستالدى.

- ۇلتتىق قۇرىلتاي - جەكە-دارا باستاما ەمەس، پرەزيدەنت جۇرگىزىپ وتىرعان كەڭ اۋقىمدى رەفورمالار ساياساتىنىڭ ءبىر بولىگى. «حالىق ۇنىنە قۇلاق اساتىن مەملەكەت» قاعيداتى اياسىندا قۇرىلتاي ازاماتتار ۇسىنىستارىن ناقتى زاڭدار مەن رەفورمالارعا اينالدىراتىن ماڭىزدى قۇرالعا اينالدى، - دەيدى ا. ايماعامبەتوۆ.

ەسكە سالساق، بۇدان بۇرىن قاسىم-جومارت توقايەۆ بۋرابايدا وتەتىن ۇلتتىق قۇرىلتايدىڭ IV وتىرىسىنا قاتىساتىنى حابارلانعان ەدى.

ۇلتتىق قۇرىلتاي جاندانعالى ەلدەگى الەۋمەتتىك- ەكونوميكالىق ماسەلەلەر شەشىم تاۋىپ كەلەدى. جىل وتكەن سايىن تاقىرىپ اياسى كەڭىدى، ايتىلاتىن سالماقتى وي ۇلعايدى. القالى جيىندا نازاردا بولعان كەمشىلىكتى تۇزەتۋ زاڭ شەڭبەرىندە بەكىپ، قوعامنىڭ وڭ باعىتقا بەت العانىن بايقايمىز. وسى ورايدا Kazinform ءتىلشىسى وتكەن قۇرىلتايلاردىڭ ناتيجەسىنە كوز جۇگىرتتى.

اۆتور

ايجان سەرىكجان قىزى