بىلتىر تۇرمەدەن شىققان پەرۋدىڭ بۇرىنعى پرەزيدەنتى البەرتو فۋحيموري قايتىس بولدى

استانا. KAZINFORM - سىبايلاس جەمقورلىق جاسادى جانە ادام قۇقىقتارىن بۇزدى دەگەن ايىپپەن 16 جىل تۇرمەدە وتىرعان پەرۋدىڭ بۇرىنعى پرەزيدەنتى البەرتو فۋحيموري 86 جاسىندا ەل استاناسى ليمادا قايتىس بولدى، دەپ حابارلادى ونىڭ وتباسى. بۇل تۋرالى BBC جازادى.

«قاتەرلى ىسىكپەن ۇزاق كۇرەسكەننەن كەيىن اكەمىز البەرتو فۋحيموري جاڭا عانا جاراتقانىنا ورالدى»، - دەپ جازدى ونىڭ بالالارى كەيكو، حيرو، ساچي جانە كەندجي فۋحيموري X الەۋمەتتىك جەلىسىندە.

جازدا كەيكو فۋحيموري اكەسىنىڭ 2026 -جىلعى سايلاۋدا مەملەكەت باسشىسى لاۋازىمىنا تاعى دا باسەكەگە تۇسۋگە نيەتتى ەكەنىن حابارلاعان.

پەرۋدى 1990-2000 -جىلدارى باسقارعان فۋحيموري بيلىك كەزىندە جاساعان قىلمىسى ءۇشىن 25 جىلدىق جازا مەرزىمىنىڭ ۇشتەن ەكىسىن وتەپ، وتكەن جىلعى جەلتوقساندا راقىمشىلىقپەن تۇرمەدەن بوساتىلعان ەدى.

وعان كوتەرىلىسشىلەرمەن كۇرەسۋ ءۇشىن «ءولىم ەسكادروندارىن» قۇردى جانە 1991-1992 -جىلدارى 25 ادامدى ولتىرۋگە قاتىستى، سونداي-اق مەملەكەت قارجىسىن جىمقىردى جانە باسقا دا سىبايلاس جەمقورلىق قىلمىستار جاسادى دەگەن ايىپ تاعىلدى.

2000 -جىلى جاپون تەكتى فۋحيموري ەلدەن شىعىپ، جاپونياعا كەتتى.

ەكس-پرەزيدەنتكە قاتىستى تەرگەۋدى باستاعان پەرۋ بيلىگى ونى ەكستراديتسيالاۋدى سۇرادى، ءبىراق جاپونيا ودان باس تارتتى.

2005 -جىلى فۋحيموري كۇتپەگەن جەردەن چيليگە كەلدى، وندا ول پەرۋ وردەرى بويىنشا تۇتقىندالىپ، ليماعا جەتكىزىلدى. ول ءوز ەلىنە ەكستراديتسيالانعان دەموكراتيالىق جولمەن سايلانعان العاشقى كوشباسشى بولدى.

2007 -جىلى ول 25 جىلعا سوتتالدى. پەرۋ پرەزيدەنتى پەدرو پابلو كۋچينسكي 2017 -جىلى فۋحيموريدىڭ دەنساۋلىعىنا بايلانىستى وعان راقىمشىلىق جاساعان بولاتىن.

سودان كەيىن البەرتو فۋحيموري اۋرۋحانا توسەگىنەن جازىلعان مالىمدەمەدە ەل ازاماتتارىنان كەشىرىم سۇراپ، پرەزيدەنتكە كەشىرىم جاساعانى ءۇشىن العىس ايتتى، ءبىراق ونى بوساتۋعا قاتىستى قۇقىقتىق داۋلارعا بايلانىستى التى جىلدان كەيىن عانا بوساتىلدى.

اۆتور
زارينا تۋعانبايەۆا