بىلتىر ەلىمىزدە 249 ايەل جۇمىستا زارداپ شەگىپ، 9 ى قايتىس بولعان
استانا. KAZINFORM - وتكەن جىلى ەلىمىزدە 249 ايەل جۇمىستا زارداپ شەگىپ، ونىڭ 9 ى قايتىس بولدى. بۇل تۋرالى قازاقستاننىڭ كاسىپوداقتار فەدەراتسيانىڭ ءتوراعاسى ساتىبالدى داۋلەتالين ءمالىم ەتتى.
«جۇمىس ىستەيتىن ايەلدەردىڭ ەڭبەكتى قورعاۋ جاعدايى قاتتى الاڭداتادى. 2023 -جىلى 249 جۇمىسشى زارداپ شەكتى، ونىڭ ىشىندە 9 ايەل قايتىس بولدى. 673 مىڭ ايەل زياندى جانە باسقا دا قولايسىز ەڭبەك جاعدايلارىندا جۇمىس ىستەيدى. ونىڭ ىشىندە 88 مىڭ ايەل سانيتارلىق- گيگيەنالىق تالاپتارعا ساي كەلمەيتىن جاعدايلاردا، 23 مىڭى شۋ مەن ءدىرىلدىڭ جوعارى دەڭگەيىندە، 17 مىڭى شاڭ پەن گازدىڭ جوعارى كورسەتكىش جاعدايىندا ەڭبەك ەتەدى. وسى ورايدا ءبىزدىڭ ۇستانىمىمىز، ەڭبەك ادامدى ءولتىرىپ نەمەسە مۇگەدەك ەتپەۋى كەرەك جانە ادامنىڭ دەنساۋلىعىنا زيان تيگىزبەۋى ءتيىس»، - دەدى ساتىبالدى داۋلەتالين ەلوردادا ءوتىپ جاتقان قازاقستان ەڭبەكشى ايەلدەرىنىڭ I فورۋمىندا.
سونداي-اق، فەدەراتسيا ءتوراعاسى ەڭبەك سالاسىنداعى ادامداردى كەمسىتۋشىلىك پەن زورلىق- زومبىلىق ماسەلەلەرىن قوزعادى.
«بۇكىل الەمدە ەڭبەك سالاسىنداعى وزەكتى ماسەلەلەردىڭ ءبىرى - جۇمىس ورنىندا كەمسىتۋشىلىك پەن زورلىق- زومبىلىقتان قورعاۋدى قامتاماسىز ەتۋ. قازاقستاندىق قوعامدا بۇل پروبلەما دا بار. ساۋالناماعا قاتىسقانداردىڭ %8,9 ى ءجيى جانە كەيدە اتالعان جاعدايعا تاپ بولعاندارىن ايتتى. ەڭبەك الەمىندەگى گەندەرلىك ساياسات، زورلىق- زومبىلىق پەن قۋدالاۋعا قارسى كۇرەس كاسىپوداقتىڭ باستى مىندەتى»، - دەيدى ول.
بۇعان قازاقستان كاسىپوداقتار فەدەراتسياسى سۋ تاسقىنىنان زارداپ شەككەندەرگە شيپاجايلاردان 186 ورىن بولگەنى تۋرالى حابارلاعان ەدىك.
ايتا كەتەيىك، بۇگىن استانادا «ەڭبەك سالاسىنداعى ايەلدەر: جاڭا شەشىمدەر ۋاقىتى» اتتى قازاقستان ەڭبەكشى ايەلدەرىنىڭ I فورۋمى ءوتىپ جاتىر. شارانى قازاقستاننىڭ كاسىپوداقتار فەدەراتسياسى ۇيىمداستىرۋدا، وعان حالىقارالىق ەڭبەك ۇيىمى، ب ۇ ۇ، ءماجىلىس دەپۋتاتتارى، ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى جانە ەڭبەك ايەلدەرى قاتىسۋدا.
اۆتور
ەسىمجان ناقتىباي