بيلەت باعاسى كۇرت تومەندەدى: ەۋروپالىقتار ا ق ش-قا بارۋدان باس تارتىپ جاتىر
استانا. KAZINFORM - ەۋروپادان ا ق ش-قا ۇشاتىن اۋە بيلەتتەرىنىڭ باعاسى پاندەميا كەزىنەن بەرى بولماعان دەڭگەيگە دەيىن تومەندەدى، دەپ حابارلايدى AZƏRTAC.
بۇل باتىس ەۋروپادان ا ق ش-قا ساپارلاردىڭ ايتارلىقتاي ازايۋىمەن بايلانىستى. ساراپشىلار بۇل تومەندەۋ كەم دەگەندە شىلدە ايىنا دەيىن جالعاسادى دەپ بولجانىپ وتىر.
ا ق ش ساۋدا مينيسترلىگىنە قاراستى ۇلتتىق ساياحات جانە تۋريزم باسقارماسىنىڭ الدىن الا دەرەكتەرىنە سايكەس، 2024 -جىلدىڭ مامىرىندا ا ق ش-قا شەتەلدەن كەلۋشىلەردىڭ سانى وتكەن جىلمەن سالىستىرعاندا 2,8 پايىزعا ازايعان. باتىس ەۋروپادان كەلگەن تۋريستەر سانى مامىردا 4,4 پايىزعا كەمىگەن.
OAG Aviation اناليتيكالىق كومپانياسىنىڭ دەرەكتەرىنە سۇيەنسەك، بولاشاققا ارنالعان بولجامدار ا ق ش-قا كەلەتىن رەيستەرگە دەگەن سۇرانىستىڭ تۇراقتى تۇردە ازاياتىنىن كورسەتىپ وتىر. شىلدە ايىنداعى شەتەلدىك رەيستەرگە جاسالعان بروندار وتكەن جىلدىڭ سايكەس كەزەڭىمەن سالىستىرعاندا 13 پايىزعا ازايعان.
ترانساتلانتيكالىق اۋە ساپارلارى ءبىرىنشى توقساننان باستاپ ازايا باستادى. بۇل ا ق ش بيلىگىنىڭ جاھاندىق ساۋدا سوعىسىن باستاپ، ميگراتسيالىق ساياساتتى قاتاڭداتۋىنان كەيىن ەۋروپالىقتاردىڭ ا ق ش-قا ساپارلارىنا قايتا قاراۋىمەن بايلانىستى. سونىمەن قاتار، دوللار باعامىنىڭ كۇشەيۋى دە كەيبىر تۋريستەردى شەتەلگە شىعۋدان تەجەگەن.
Cirium كومپانياسىنىڭ تالداۋىنا سايكەس، 2024 -جىلدىڭ ءبىرىنشى توقسانىندا ا ق ش پەن ەۋروپا اراسىنداعى 50 دەن استام باعىت بويىنشا ەكونوم-كلاسس بيلەتتەرىنىڭ ورتاشا باعاسى وتكەن جىلمەن سالىستىرعاندا 7 پايىزعا ارزانداعان. اتلانتا (دجوردجيا شتاتى) مەن لوندون اراسىنداعى رەيستەر تاريفى 55 پايىزعا تومەندەگەن.
ساياحاتتاردى برونداۋعا ارنالعان Hopper قوسىمشاسى جازعى ماۋسىمدا ا ق ش پەن ەۋروپا اراسىنداعى ەكى جاقتى رەيستەر بيلەتتەرىنىڭ باعاسى بىلتىرعىعا قاراعاندا 10 پايىزعا ازايعانىن حابارلايدى. ورتاشا بيلەت باعاسى 817 دوللار بولىپ، 2019 -جىلعى پاندەمياعا دەيىنگى دەڭگەيمەن تەڭەستى.
امەريكالىق تۇتىنۋشىلار ءتيىمدى ۇسىنىستاردى ىزدەپ، ساپار كۇنى جاقىنداعانشا شەشىم قابىلداۋدى كەيىنگە قالدىرعاندىقتان، ەۋروپا تاراپىنان سۇرانىستىڭ ازايۋى ساياحاتتاردىڭ ارزانداۋىنا قوسىمشا اسەر ەتىپ جاتىر.
اۆتور
نازىم بولەسوۆا